बंगलादेशमा भइरहेको धार्मिक हिंसाप्रति राप्रपा नेपालको विरोध

राप्रपा नेपालले बंगलादेशमा धार्मिक आस्थाका आधारमा भएको हिंसाप्रति विरोध जनाएको छ । राप्रपा नेपालका अध्यक्ष कमल थापाले शनिबार विज्ञप्ति जारी गरी धार्मिक आस्थाका आधारमा भएको हिंसाप्रति विरोध जनाएका हुन् । 

‘आन्दोलनको बलमा सत्ता परिवर्तन भैसकेपछि पनि हिन्दूहरूमाथि अमानवीय र निर्मम आक्रमण हुनु तथा मन्दिरमा तोडफोड गरिनु मानव अधिकारको ठाडो उल्लंघन हो,' उनले जारी गरेको विज्ञप्तिमा भनिउको छ, 'धार्मिक आस्थाको आधारमा भएका हिंसाको राप्रपा नेपाल घोर भत्सर्ना र विरोध गर्दछ ।’

अध्यक्ष थापाले हिंसात्मक प्रदर्शनको क्रममा हिन्दुहरूमाथि संगठित आक्रमण भैरहेको समाचारले विश्वभरका सनातन धर्मावलम्बीहरूलाई स्तब्ध बनाएको समेत बताएका छन् । 

अध्यक्ष थापाले हिन्दूहरूमाथि भैरहेको आक्रमण अन्त्य गर्न र पीडितहरूको उद्धार र सहयोगका निम्ति बंगलादेश सरकार र संयुक्त राष्ट्रसंघको ध्यानाकर्षण गराउन सरकारसँग माग समेत गरेका छन् ।