सहकारी ठगीका आरोपीलाई नख्खु जेलबाट ल्याएर विशेष समितिले गर्‍यो सोधपुछ

सहकारी संस्था ठगीको छानबिन गर्न बनेको संसदीय छानबिन विशेष समितिको बैठकले रकम दुरुपयोग गर्ने सहकारीका अध्यक्षलाई जेलबाटै ल्याएर छलफल गरेको छ । 

शनिबार समितिले तुलसी बहुउद्देश्यीय सहकारी संस्थाका अध्यक्ष केदारनाथ शर्मासँग नख्खु जेलबाट समितिको बैठकमा ल्याएर सोधपुछ गरेको सभापति सूर्य थापाले जानकारी दिए । 

‘विशेष समितिको कार्यविधिअनुसार विभिन्न सहकारीको बचत दुरुपयोगमा संलग्न व्यक्तिहरूमध्ये तुलसी बहुउद्देश्यीय सहकारी संस्थाका अध्यक्ष केदारनाथ शर्मासँग नख्खु जेलबाट समितिको बैठकमा ल्याएर सोधपुछ गरिएको छ,’ थापाले भनेका छन् ।

शर्मा विराटनगरस्थित तुलसी बहुमुखी सहकारीमा हजारौं नागरिकको करोडौं बचत रकम अपचलनको आरोपमा पक्राउ परेका थिए । शिवशिखर सहकारीमा १४ अर्बभन्दा बढी रकम हिनामिना गरेको आरोप पनि उनीमाथि छ ।

समितिले अहिलेसम्म ३४ औं बैठक गरिसकेको थापाले जानकारी दिए ।