बङ्गलादेशका दुई कारागारबाट कैदी भाग्ने क्रममा झडपः १२ जनाको मृत्यु

ढाका– पूर्वप्रधानमन्त्री शेख हसिना अपदस्थ भएको केही दिनपछि बङ्गलादेशका दुई कारागारबाट कैदीहरू भाग्ने प्रयास गर्दा भएको झडपमा परी कम्तीमा १२ जनाको मृत्यु भएको अधिकारीहरूले शनिवार बताएका छन् ।  
 
देशको राजधानी ढाकाको उत्तरमा रहेको दुबै कारागारमा भएको यो घटना राष्ट्रव्यापी अशान्तिले निम्त्याएको एक श्रृंखला हो।

आक्रोसित कैदीहरूले जेलका गार्डलाई आक्रमण गरेका थिए । जामपुर जेलमा भएको कैदी र प्रहरीको झडपमा बिहीवार ६ जना कैदीको मृत्यु भएको वार्डेन अबु फताहले बताए ।  

कैदीहरूले सुरक्षाका लागि खटिएका प्रहरीलाई फलामको रड र धारिलो हतियारले आक्रमण गरेका थिए ।  कारागारमा आगो लगाएर भाग्ने  प्रयास गरेपछि भएको झडपमा  कैदीहरूको मृत्यु भएको फताहले बताएका छन् ।  ‘कैदीहरूको अराजक गतिविधिले हामी गोली चलाउन बाध्य भएका हौँ,’ उनले भने । 

त्यसैगरी, उच्च सुरक्षासहितको काशमपुर जेलमा मङ्गलवार कैदीहरू भाग्ने प्रयासका कारण भएको झडपमा  अन्य ६ जना कैदीको मृत्यु भएको जेलका वार्डेन लुत्फर रहमानले बताए ।  

रहमानले कैदीहरूले गार्डमाथि आक्रमण गरी जेलको मुख्य गेट फुटाएर भाग्न खोजेपछि गोली चलाउन बाध्य भएको बताए । झडपका क्रममा उक्त जेलबाट करिब दुई सय कैदीहरू भागेको उनले उल्लेख गरे ।

हसिना सरकारविरुद्ध विरोध प्रदर्शन शुरू भएदेखि बङ्गलादेशभरी कैदीबन्दीहरू जेलबाट भाग्ने प्रयासमा छन् ।  

पूर्वप्रधानमन्त्री हसिनाले राजीनामा दिएको दिन सोमवार उत्तरी जिल्ला सेरपुरको जेलबाट पाँच सयभन्दा बढी कैदीहरू भागेका थिए ।