बेलहियामा एकीकृत भन्सार जाँच चौकी धमाधम निर्माणः सकियो ५० प्रतिशत काम

रुपन्देहीको बेलहियामा ​बनाउन थालिएको एकीकृत भन्सार जाँच चौकी (आईसीपी) निर्माणकाे काम तीव्ररुपमा भइरहेको छ । भैरहवा भन्सारनजिकै निर्माण भइरहेको जाँच चौकीको अहिलेसम्म ५० प्रतिशत काम सकिएको छ ।

दुई वर्षमा काम सम्पन्न गरी नेपाल सरकारलाई हस्तान्तरण गर्ने नेपाल–भारतबीच भएको सम्झौताअनुरुप गत २६ मे २०२३ मा काम शुरू भएको थियो ।  निर्माण कम्पनीले १५ महिनाको अवधिमा फिल्डमा ५० प्रतिशतभन्दा बढी काम सम्पन्न गरेको भारतीय सरकारी कम्पनी राइट्सका आयोजना प्रमुख नीतिन श्रीवास्तवले जानकारी दिए । 

१८ वर्षअघि आईसीपी निर्माण गर्ने सम्झौता भारत सरकारसँग भए पनि भारततर्फ जग्गा अधिग्रहणको समस्या भएका कारण निर्माणको काम शुरू हुन ढिलाइ भएको थियो । राइट्स भारत सरकारको आधिकारिक डिजाइनर कम्पनी रहेकोमा यो कम्पनीले आईसीपी निर्माणको ठेक्का भारतीय निर्माण कम्पनी वसिर मोहमद एनड सन्सलाई दिएको छ । विभिन्न १२ वटा भवनको ५० प्रतिशत काम सम्पन्न भएको श्रीवास्तवले जानकारी दिए । 

प्रशासनिक भवन, वयरहाउस, अध्यागमन, सुरक्षा भवन, क्वारेन्टिन भवनलगायत १२ वटा भवनको तला ढलानको कामसमेत सम्पन्न भएको छ । यस्तै पार्किङको काम पनि करिब ८० प्रतिशत सम्पन्न भएको छ ।  सम्झौताअगावै काम सम्पन्न गरी नेपाल सरकारलाई हस्तान्तरण गर्ने आयोजनाको तयारी छ । राइट्स कम्पनीले नेपालगञ्ज, वीरगञ्ज र विराटनगर भन्सार एकीकृत केन्द्रको निर्माण सम्पन्न गरिसकेको छ । पूर्वाधार सम्पन्न भएपछि आईसीपीमा लाग्ने अन्य आवश्यक पूर्वाधार मशिन जडान, खानेपानी, विद्युत् व्यवस्थापन भने नेपाल सरकारले गर्नेछ । 

एक अर्ब ६१ करोड ७५ लाख भारतीय रुपैयाँको लागतमा भारत सरकारको आर्थिक लगानीमा निर्माण भइरहेको आईसीपीमा एकैपटक ६५२ ट्रक आयात र २७० ट्रक निर्यात हुनेगरी कार्गो पार्किङ्गस्थल निर्माण भइरहेको छ । आईसीपीको निर्माणपछि  दैनिक ८०० देखि ८५० मालबाहक सवारी सहजै आवतजावत गर्न सक्नेछन् । कुल ३५.११ हेक्टर क्षेत्रफलमध्ये २२.५४ हेक्टर आईसीपीले ओगटेको छ । आईसीपी निर्माणसँगै सीमानामा भोग्दै आइरहेको जाम हट्नुका साथै सवारीसाधनको इन्धनमा बचत, सीमा क्षेत्र शान्त तथा स्वच्छ हुने अपेक्षा गरिएको अन्नपूर्ण टर्मिनल्स प्रालि, भैरहवाका रवि पारिखले बताए । 

नेपाल–भारत दुवै देशतर्फ एकैपटक आईसीपी निर्माणको काम गर्ने लक्ष्य रहेपनि जग्गा अधिग्रहणमा ढिलाइ हुँदा भारतर्फको काममा केही ढिलाइ भएको थियो । हाल दुवैतर्फ काम भइरहेको भैरहवा भन्सार कार्यालयका प्रमुख भन्सार अधिकृत नारद गौतमले जनाए । भैरहवा नेपालको दोस्रो ठूलो भन्सार नाका हो ।