विद्यार्थीको दबाबपछि बंगलादेशका प्रधानन्यायाधीशले दिए राजीनामा

विद्यार्थीको दबाब थेग्न नसकेपछि बंगलादेशका प्रधानन्यायाधीश ओबिदुल हसनले राजीनामा दिएका छन् । अन्तरिम सरकारका कानूनमन्त्री प्राध्यापक आसिफ नजरुलले प्रधानन्यायाधीश हसनले राजीनामा दिएको पुष्टि गरेका हुन् ।

शनिवार बिहान १० बजेतिर प्रदर्शनकारीको एक समूहले बंगलादेशको सर्वोच्च अदालतबाहिर प्रधानन्यायाधीश र सातजना न्यायाधीशको राजीनामा माग गर्दै प्रदर्शन गरेको थियो । यसैलाई थेग्न नसकेर प्रधानन्यायाधीश हसनले शनिवार दिउँसो राजीनामा दिएका हुन् । 

अन्य न्यायाधीशले भने राजीनामा दिएको खबर बाहिरिएको छैन । शेख हसिना प्रधानमन्त्रीबाट अपदस्थ भएपछि बंगलादेशमा विद्यार्थीले भनेअनुरुप नै शासन व्यवस्था चलिरहेको छ ।