कांग्रेसका युवा नेताहरूले गुट निरपेक्ष अभियान चलाउने

नेपाली कांग्रेसका गुरु घिमिरेसहितका युवा नेताहरूले लोकतन्त्र सम्वर्द्धनका लागि नयाँ अभियान चलाउने भएका छन् ।

घिमिरेसहित पूर्व मन्त्री जनक गिरी, युवा नेता टेकराज पौडेल, नारायण भट्टराई, त्रिचन्द्र कलेजकी प्राध्यापक डा. लता घिमिरेसहितका १५ जनाबीच छलफल भएको थियो ।

काभ्रेको धुलिखेलमा दुई दिनसम्म चलेको छलफलले पहिलो चरणमा केन्द्रमा सुशासन, लोकतन्त्रको सुदृढीकरण, संविधान संशोधनसहितका विषयमा कार्यक्रम गर्ने निर्णय गरेको छ ।

नेता घिमिरेका अनुसार उपसभापति, महामन्त्रीसहितका ४/५ जना नेतालाई बोलाएर दुई हप्ताभित्र छानिएका एक सय विशेषज्ञसहितको उपस्थितिमा एक दिवसीय कार्यशाला गोष्ठी गरिनेछ ।

‘लोकतन्त्रको सम्वर्द्धनलाई मुख्य थिम बनाएर हामीले दुई हप्ताभित्र राष्ट्रिय स्तरको कार्यशाला गोष्ठी गर्ने निर्णय गरेका छौं,’ घिमिरेले लोकान्तरसँग भने, ‘कार्यक्रममा सभापतिभन्दा मुनिका ४/५ जना नेतालाई बोलाउँछौं । छानिएका विज्ञसहितका एक सय जना यो कार्यक्रममा सहभागी हुनुहुन्छ । यो गुट निरपेक्ष कार्यक्रम हुनेछ ।’ 

यस अघिको पुरानो रुपान्तरण अभियानकै निरन्तरता स्वरूप डेमोक्रेसी डाइलग (लोकतन्त्र संवाद)ले यो कार्यक्रमको संयोजन गरेको घिमिरेले जानकारी दिए ।

समसामयिक राजनीति, संविधान संशोधनको आवश्यकता, कांग्रेसको आन्तरिक लोकतन्त्रसहितको विषयलाई प्राथमिकता बनाएर छलफल गर्ने उनको भनाइ छ ।

‘अहिलेको सत्ता समीकरणले मुख्य विषय संविधान संशोधन भनेको छ । यसलाई कसरी सार्थक बनाउने ? यो कति आवश्यक छ ?  हामी यसमा बहस चलाउँछौं,’ घिमिरेले भने, ‘साथै कांग्रेसको आन्तरिक लोकतन्त्रको विधि, पद्धति कति पालना भएको छ ? पार्टीका साथीको मूल्यांकन, टिकट र सदस्यता वितरण प्रणाली कस्तो छ ? गुटमा विभाजित भएकालाई कस्तो व्यवहार छ गुट निरपेक्षतालाई कस्तो हुन्छ भन्ने विषयमा पनि हामी छलफल गर्छौं ।’

अरु पार्टी कसरी चलेका छन् भन्ने विषयलाई कार्यक्रमले समेट्ने घिमिरे बताउँछन् ।

'सुशासन दिने सरकारको नारामा कसले कहाँ के बाधा पुर्‍याएको छ, गर्न सकिन्छ/सकिँदैन भन्नेमा पनि बहस गर्दै लोकतन्त्रलाई सुदृढ गर्ने विषयमा भूमिका खेल्न कार्यक्रम गर्छौं,' घिमिरेले भने ।

केन्द्रपछि दोस्रो राउन्डमा सातै प्रदेशमा यस्तै स्वरूपको कार्यक्रम गर्ने तयारी छ ।

सम्बन्धित प्रदेशमा सांसद भएका, चुनाव लडेका, जिल्ला सभापति, पूर्व सभापतिसहित भइसकेकाहरूलाई सहभागी गराएर महिनाको दुई वटाको दरले प्रदेशस्तरीय कार्यक्रम गर्ने तयारी डेमोक्रेसी डाइलगको रहेको छ ।

त्यस्तै एक वर्षमा सात प्रदेशको कार्यक्रम सकेपछि यस्तै स्वरूपमा जिल्ला केन्द्रित कार्यक्रम गरिने डेमोक्रेसी डाइलगका नारायण भट्टराईले जानकारी दिए ।