माओवादी बैठकमा जनार्दन शर्मा– पार्टीका एजेन्डा खोसिँदै गए, शून्यतर्फ उन्मुख छौँ

नेकपा माओवादी केन्द्रका उपमहासचिव जनार्दन शर्माले पार्टी एजेन्डाविहीन बन्दै शून्यतातर्फ अग्रसर भएको बताएका छन् । कार्यकर्ताहरू चरम निराशा र असन्तुष्टिमा बाँचेको उनले बताए । 

माओवादी स्थायी कमिटी बैठकलाई शनिवार सम्बोधन गर्दै शर्माले पार्टी योजनाविहीन र सङ्गठनविहीन बन्दै गइरहेको बताएका हुन् । ‘माओवादी आन्दोलन अप्ठेरो अवस्थामा पुगेको छ । हामी योजनाविहीन र सङ्गठनविहीन बनेका छौँ । पार्टीको जनाधार खस्किएको छ र देखाउन लायक काम गर्न सकेका छैनौ’ शर्माको भनाइ उद्धृत गर्दै स्रोतले भन्यो । 

शर्माले माथि देखि तलसम्म सङ्गठनमा परिवारवाद हाबी भएको आरोप लगाए । ‘पार्टी आम जनताबाट अलग भएको छ । एजेन्डा खोसिँदै गए, हामी शून्यतातर्फ उन्मुख छौँ’ उनले बैठकमा भनेका थिए, ‘यो कमजोरीको जिम्मेवारी लिन मूल नेतृत्व पनि तयार छैन । हामी पदाधिकारीले पनि आनाकानी गरिरहेका छौँ ।’

शर्माले पार्टीको साख फर्काउन जनतामा जान जरुरी रहेको बताए । ‘कार्यकर्ता र जनताले हामीहरूसँग अँगालो हाल्न खोजेका छन्, हामीले त्यो अवसर दिएका छैनौँ’, उनले भने ।