जनार्दनको लाइनमा वर्षमानपत्नी ओनसरी– ३५ वर्षपछि प्रचण्डप्रति शंका लाग्यो !

नेकपा (माओवादी केन्द्र)की स्थायी कमिटी सदस्य ओनसरी घर्तीले पहिलोपटक अध्यक्ष पुष्पकमल दाहाल ‘प्रचण्ड’प्रति शंका बढेको बताएकी छन् । 

विधि र पद्धतिको कुरा गर्नेलाई पार्टी विभाजनको आरोप लगाउने नेतृत्वको कार्यशैली आपत्तिजनक भएको उनको भनाइ छ ।

आइतबार बसेको माओवादी स्थायी कमिटी बैठकलाई सम्बोधन गर्दै ओनसरीले राज्यसत्ता पार्टीकै नेतालाई सकाउन लागिपरेको आरोप आरोप लगाइन् ।

शनिबारको बैठकमा उपमहासचिव जनार्दन शर्माले पार्टीमा विधिको कुरा गर्नेविरुद्ध राज्यसत्ता प्रयोग गरिएको आरोप लगाएका थिए । 

ओनसरीले शर्माकै लाइनमा कुरा राखेकी हुन् ।

‘राज्यसत्ता हामीतिर नै लगाउन खोजियो । पार्टीमा आशंका र अविश्वास यति बढ्यो कि ३५ वर्षको यात्रामा अध्यक्ष प्रचण्डप्रति पहिलोपटक शंका लाग्यो,’ ओनसरीको भनाइ उद्धृत गर्दै बैठकमा सहभागी एक नेताले भने ।

पार्टीकै नेताहरूविरुद्ध राज्यसत्ताको प्रयोग गरेर गलत हल्ला फिँजाइएको आरोप उनको थियो ।

उनले ‘कोरी (कुष्ठरोगी) नै भएपनि बाउ त मान्नुपर्‍यो’ भन्दै मान्नकै लागि प्रचण्डलाई अध्यक्ष स्वीकारिएको टिप्पणी गरिन् ।

‘बाहिर माओवादी सकिन्छ भनेर चर्चा भइरहेका छन्, त्यसको प्रतिवादका लागि पनि हामीले नेतृत्व चयनको विधि स्थापित गर्नुपर्छ,’ उनले बैठकमा भनेकी थिइन् । 

सम्बोधनका क्रममा प्रचण्डले शान्ति प्रक्रियामा आएपछि दलाल र पुँजीपतिसँग पनि संगत भएको बताएका थिए । 

ओनसरीले किन र को–को दलालसँग संगत गरेको भनेर प्रचण्डलाई प्रश्न गरिन् । 

पार्टीभित्र सांस्कृतिक विचलन र बर्ग चेतना स्खलित भएको भन्दै उनले दुःख व्यक्त गरेकी थिइन् ।

‘कुनै महिला कमरेडले सौता व्यहोर्नुपर्ने अवस्था आयो भने पार्टीबाट न्याय दिन सक्नुहुन्छ ?’ उनले प्रश्न गरिन् । 

पूर्व सभामुख समेत रहेकी ओनसरी पार्टी उपमहासचिव वर्षमान पुन ‘अनन्त’की पत्नी हुन् ।

बैठकमा उपमहासचिव शक्ति बस्नेतले पनि प्रतिस्पर्धाबाट नेतृत्व चयनको विधि स्थापित गर्नुपर्ने बताएका थिए । 

शनिबारदेखि जारी माओवादी बैठकमा बोल्ने सदस्यहरूले पटक–पटक सरकारको नेतृत्वमा पुगे पनि जनताको मन जित्न नसकिएकाले जनाधार घट्दै गएको भन्दै चिन्ता व्यक्त गरिरहेका छन् ।