एमाले सांसदले रवि लामिछानेलाई सहकारी ठगीमा मुछिएको आरोप लगाएपछि...

नेकपा (एमाले)का एक सांसदले आफ्ना सभापति रवि लामिछानेलाई ‘सहकारी ठगीमा मुछिएको मान्छे’ भनेर आरोप लगाएपछि संसदमा राष्ट्रिय स्वतन्त्र पार्टी (रास्वपा)ले नियमापत्ति गरेको छ । छानबिन समितिको निर्णय नआउँदै दोषी करार गरेको भन्दै रास्वपाले आपत्ति जनाएको हो ।

मंगलवार बसेको प्रतिनिधिसभा बैठकमा एमाले सांसद दामोदर पौडेल बैरागीले सहकारी ठगीमा मुछिएको मान्छेले चर्को कुरा गरेको भन्दै कटाक्ष गरेका हुन् । 

‘म पोखराको मान्छे, पोखरामा सहकारी ठगीहरूको बिगबिगी छ, सहकारी ठगीबारे धेरै विषय उठेको छ । हाम्रा माननीय रवि लामिछानेको नाम पनि मुछिएको छ, अझ उहाँ नै चर्को कुरा गर्नुभा छ,’ पौडेलले भने, ‘उहाँ नै चर्को कुरा गरेर थर्काउन खोज्नु हुन्छ, हिजो उपप्रधानमन्त्री हुँदा पनि त्यस्तै स्वर थियो, अहिले प्रतिपक्षमा पुग्दा पनि त्यस्तै स्वर छ । सहकारीको व्यवस्था गर्नु पर्दैन ? ठगिएको रकम फिर्ता गर्नु पर्दैन ? उहाँको नाम कहाँ छ, कसैले देखेको छैन ! कत्रो फाइल छ उहाँको विषयमा ! यस्ता विषयमा धेरै कुरा नगरेको राम्रो ।’ 

पौडेलले बोल्दा बोल्दै रास्वपाका मनीष झाले नियमापत्ति गर्दै सहकारी ठग भनेर दोषी करार गर्न नपाइने बताए । ‘संसदीय छानबिन समितिको निर्णय आउन बाँकी छ, कुनै व्यक्तिलाई कसरी दोषी करार गर्दै हुनुहुन्छ ? यसरी नाम तोकेर यस्तो अभियोग भन्न पाइन्छ ? संसदीय छानबिन समिति बनेपछि आपत्तिपूर्ण अभिव्यक्ति दिन पाइँदैन,’ झाले भने । 

त्यसपछि एमालेका सांसद पौडेलले संसदमा अराजकता निम्ताइएको आरोप लगाए । लगत्तै रास्वपा सांसदहरू उठेर पुनः नियमापत्ति गरे । 

त्यसपछि सभामुख देवराज घिमिरेले वाद–प्रतिवाद नगर्न रुलिङ गरे । त्यसपछि बोलेका सांसद पौडेलले संसदीय अराजकताकै कारण युवा पलायन हुने अवस्थाको सिर्जना आएको बताए ।