मुस्ताङको दामोदरकुण्ड जाँदा बिरामी परेकी गण्डकी प्रदेशकी सांसद विमला गौचनलाई उद्धार ​गरेर जोमसोम ल्याइएको छ ।

बिहीबार बिरामी परेकी गौचनलाई नेपाली सेनाको टोलीले उद्धार गरेर जोमसोम बजार ल्याएको सैनिक प्रवक्ता एवं सहायक रथी गौरवकुमार केसीले जानकारी दिए ।​

भदौ २ गते दामोदरकुण्ड पुगेकी सांसद गौचन बिरामी परेपछि सेनाको डाक्टर अधिकृतसहितको उद्धार टोलीले खटिएको थियो ।

प्रतिकूल मौसमका कारण हेलिकोप्टरबाट उद्धार गर्न कठिनाइ भएपछि सेनाको टोलीले आवश्यक औषधि तथा उद्धार सामग्रीसहित शुक्रबार मुस्ताङको सदरमुकाम जोमसोम ल्याएको हो ।

उनलाई डोकोमा बोकेर तथा घोडामा चढाएर जोमसोम ल्याइएको सेनाले जनाएको छ ।