बुटवलमा ‘गेम चेन्जर’ आयोजनाको शिलान्यास, पाँच वर्षमा १२ सय शय्याको अस्पताल बन्ने

रूपन्देहीको बुटवलमा देशकै ठूलो र सुविधासम्पन्न अस्पताल निर्माण शुरू भएको छ । पश्चिम क्षेत्रमा उपचारको प्रमुख गन्तव्य बुटवलमा १२ सय शय्याको १२ तले अस्पताल भवन निर्माणको शनिबार उपप्रधान तथा अर्थमन्त्री विष्णु पौडेलले  शिलन्यास गरेका हुन् । 

शनिबार शिलन्यास भए पनि अस्पताल निर्माणको काम गएको माघदेखि नै अघि बढेको थियो । राणाप्रधानमन्त्री चन्द्र शमशेरको पालामा वि.सं १९६७ सालमा ६ बेडबाट शुरूआत भएको अस्पताल अहिले नारायणी पश्चिमको स्वास्थ्य क्षेत्रमा ‘गेम चेन्जर’ परियोजना हुने अपेक्षा गरिएको छ ।

लुम्बिनी प्रदेश सरकारको गौरवको आयोजनाका रूपमा अघि बढाइएको अस्पताल भवन देशकै सरकारी अस्पतालहरूमध्ये सबैभन्दा अग्लो र ठूलो हुनेछ ।  पश्चिम नेपालका नागरिकले उपचारका लागि धाउने प्रादेशिक अस्पतालमा जनशक्तिको अभाव, सरोकारवालाको बेवास्ता र उपचारमा ढिलासुस्तीले बिरामी र आफन्तले भोग्दै आएको सास्ती सुविधासम्पन्न अस्पताल भवन निर्माणपछि अन्त्य हुने अपेक्षा गरिएको छ । लुम्बिनी प्रदेशका मुख्यमन्त्री चेतनारायण आचार्यले प्रादेशिक अस्पताल बनेपछि देशकै नमूनाको रूपमा विशेषज्ञ अस्पतालमा परिणत हुने बताए ।  

११५ वर्ष पुरानो अस्पताल २०२४ मा ५० शय्यामा स्तरउन्नति भएको थियो । २०५० सालमा १०० शय्यामा विस्तार भएको अस्पतालमा २०७२ सालबाट सरकारबाट ३०० र विकास समितिबाट १०० गरी ४०० बेडमा स्तरोन्नति भएको थियो । अहिले ५२४ बेडमा बिरामीको उपचार भइरहेको छ । प्रादेशिक अस्पतालले लुम्बिनी, गण्डकी, सुदूरपश्चिम प्रदेश र सीमावर्ती भारतीय क्षेत्रकागरी करिब ५० लाख नागरिकलाई स्वास्थ्य सेवा उपलब्ध गराउँदै आएको अस्पतालको रेकर्डमा उल्लेख छ । 

बहुउपचारीय ‘गेम चेन्जर’ र रणनीतिक महत्त्वको परियोजना भएकाले निर्माणको काम तीव्र गतिमा अगाडि अस्पतालका डा. तथा पूर्वमेडिकल सुपरीटेन्डन डा. इन्द्र ढकालले बताए । अब बन्ने अस्पतालको मुख्य भवन अन्डरग्राउण्डसहित १२ तलाको हुनेछ भने क्यान्सर उपचारका लागि अन्डरग्राउन्डसहित पाँच तलाको अलग्गै भवन ‘ओन्कोलोजी ब्लक’ बन्नेछ । 

गुरूयोजनाअनुसार अस्पतालको संरचना निर्माणका लागि ८ अर्ब ९९ करोड ७५ लाख ६४ हजार १९९ रूपैयाँ बराबरको लागत अनुमान गरिएको थियो । तर, निर्माण कम्पनीले ६ अर्ब १८ करोड ७५ लाख रुपैयाँमा पाँच वर्षमा निर्माण सक्नेगरी हालै (पुस २६ गते) ठेक्का सम्झौता गरेको छ ।

अहिले पहिलो चरणमा अस्पतालको सबैभन्दा पुराना भवन र संरचनाहरू हटाइने छ । अस्पताल निर्माण सम्झौता भएको पाँच वर्ष (वि.सं.२०८५ साल पुस)मा निर्माण सक्नेगरी भवन निर्माणको सम्झौता भएको छ । लुम्बिनीका संस्थापक मुख्यमन्त्री शंकर पोखरेलको परिकल्पना अनुसार अस्पताल निर्माण अघि बढेको हो । 

बुटवल उपमहानगरपालिका– ९ मा रहेको ६ बिघा १२ कठ्ठा जग्गामा अत्याधुनिक संरचनासहितको अस्पताल भवन निर्माण हुन प्रदेश पूर्वाधार विकास प्राधिकरणका प्रमुख कार्यकारी अधिकृत (सीईओ) इञ्जिनीयर छविराज पोखरेलले जानकारी दिए । हालको ३०० (सीमितबाट थप भएकासमेत गरी ५००) शय्याको अस्पताललाई विस्तारगरी न्यूनतम् १ हजार २०० शय्याको क्षेत्रीय बहुअनुशासनात्मक अस्पतालमा स्तरोन्नति गर्ने प्रस्ताव गरिएको पोखरेलको भनाइ छ । 

निर्माणको काममा निगरानी आवश्यक
उपप्रधान एवं अर्थमन्त्री विष्णु पौडेलले आयोजना सम्पन्न गर्न जनस्तरबाट निगरानी गर्नुपर्ने बताएका छन् । विकासका काममा सत्ता र प्रतिपक्ष मिलेर काम गर्ने उनले बताए । उनले विकास निर्माणमा सत्ता पक्ष प्रतिपक्षसँग सँगसँगै हिँड्ने बताए । 

समयमै काम सकेर स्याबासी कमाउन प्रदेश सरकार, प्रदेश पूर्वाधार विकास प्राधिकरण र निर्माण कम्पनीलाई आग्रह उनले गरे । ‘छिटो सक्ने नाममा गुणस्तरमा सम्झौता हुन सक्दैन, गुणस्तरीय काम गरेर समयमै सक्नेगरी अगाडि बढ्नुपर्छ,’ उनले भने । तीन वर्षमा सक्छु भनेको काम नसकेर पछुताउने अवस्था नआओस् भन्दै भनेकै अवधिमा काम पूरा हुने उनले विश्वास गरे ।

प्रदेशवासीका लागि गौरवको क्षणः मुख्यमन्त्री आचार्य 
लुम्बिनी प्रदेशका मुख्यमन्त्री चेतनारायण आचार्यले प्रादेशिक अस्पताल शिलान्यास समारोह लुम्बिनी प्रदेशको लागि खुसीको क्षण भएको बताए । लुम्बिनी प्रादेशिक अस्पताल शिलान्यास कार्यक्रमलाई सम्बोधन गर्दै उनले प्रदेशबासीका लागि गौरवपूर्ण क्षण भएको बताए । 

प्रादेशिक अस्पताल निर्माणको प्रक्रिया २०७६ सालबाट शुरू भएको जानकारी दिँदै उनले प्रदेशका नागरिकको गुणस्तरीय स्वास्थ्य सेवा प्राप्त गर्ने अधिकार सुनिश्चित गर्न प्रदेश सरकार दृढ रहेको बताए ।

 ‘विधिवत रूपमा अस्पताल बनाउन शुरू गरेका छौं । यहाँ प्राप्त सुझावलाई प्रदेश सरकारले आत्मसात गर्छ । यो आयोजनालाइ उच्च प्राथमिकमा राखेर प्रदेश सरकारले चालु आर्थिक वर्षमा १ अर्ब ८० करोडको बजेट राखेका छौं,’ उनले भने ।