सरकारले भेटेन सर्वोत्कृष्ट कर्मचारी, दुर्गा प्रसाईँको बीएन्डसीलाई एमबीबीएस पढाउन स्वीकृति

‘लोकान्तर राउण्ड अप’मा पाठकवृन्दलाई स्वागत छ । सधैँझैँ आज पनि हामी बितेको २४ घण्टाका मुख्यमुख्य घटनाक्रमसहित उपस्थित भएका छौँ–
प्रधानमन्त्री केपी शर्मा ओलीले प्रमुख प्रतिपक्षी दलका नेता पुष्पकमल दाहाल प्रचण्डलाई जनयुद्धको पैरवी नगर्न चेतावनी दिएका छन् ।
शनिवार उनले जनयुद्ध महान थियो भने किन छोडेको भनेर पूर्व प्रधानमन्त्रीसमेत रहेका प्रचण्डलाई प्रश्नसमेत गरे ।

२१ औं निजामती सेवा दिवसको अवसरमा काठमाडौँमा आयोजना गरिएको एक कार्यक्रममा बोल्दै प्रधानमन्त्री ओलीले भने, 'देशमा हिंसा थियो त्यसलाई व्यवस्थापन गर्नुपर्यो । त्यसलाई केही मान्छेहरुले महिमामण्डन गरेको सुन्छु । त्यस्तो महान थियो भने किन छोड्या त त्यो बाटो ?'

उनले सत्ता छोड्नुपरेको आक्रोशमा माओवादी केन्द्रका अध्यक्ष प्रचण्डलाई जथाभावी नबोल्नसमेत चेतावनी दिएका छन् ।
००००
यसैबीच ओलीले ४० जना कर्मचारीलाई निजामती सेवा पुरस्कार प्रदान गरेका छन् । प्रधानमन्त्री ओलीले १० उत्कृष्ट निजामती सेवा पुरस्कार र ३० जना निजामती सेवा पुरस्कार पाउने कर्मचारीलाई ताम्रपत्रसहित पुरस्कृत गरेका हुन् ।

सरकारले ८ वर्षयता अर्थात २०७३ यता सर्वोत्कृष्ट कर्मचारी भने पाउन सकेको छैन । यसले कर्मचारी प्रशासनले कति इमानदार भएर काम गरिरहेको छ भन्ने प्रश्न खडा भइरहेको कतिपयको भनाइ छ । उनीहरुले कर्मचारीलाई चुस्त र प्रभावकारी बनाउन धेरै मेहनत गर्नुपर्नेमा जोड दिँदै आएका छन् ।
००००
दुर्गा प्रसाईंको बीएन्डसी मेडिकल कलेज टिचिङ एन्ड रिसर्च प्रालिले लामो पर्खाइपछि चिकित्सा शिक्षा आयोगबाट चिकित्सा शास्त्रको स्नातक तह (एमबीबीएस)मा ५० जना विद्यार्थी अध्यापन गराउने औपचारिक स्वीकृति पाएको छ ।

कलेजका जनसम्पर्क अधिकृत प्रमीश गिरीले आयोगबाट पहिलोपल्ट यसै शैक्षिक वर्षमा ५० जना विद्यार्थी पढाउन पाउनेगरी सिट निर्धारण भएको बताए । आयोगले शुक्रबार नै सिट निर्धारण बारेमा सार्वजनिक सूचना जारी गरिसकेको उनले जानकारी दिए ।
००००
नेकपा एकीकृत समाजवादीका महासचिव घनश्याम भुसालले ४०–५० करोडभन्दा माथिका भ्रष्टाचार मुद्दामा ठूला दलहरूबीच राष्ट्रिय सहमति हुने गरेको आरोप लगाएका छन् । 
शनिवार काठमाडौंमा आयोजित हरि रोकाद्वारा लिखित पुस्तक ‘वैकल्पिक अर्थतन्त्र’को विमोचन र विमर्श कार्यक्रममा उनले यस्तो बताएका हुन् ।
००००
नेकपा एकीकृत समाजवादीका अध्यक्ष एवं पूर्वप्रधानमन्त्री माधवकुमार नेपाल रुसको भ्रमण सम्पन्न गरी शनिवार स्वदेश फर्किएका छन् । उनलाई काठमाडौंको त्रिभुवन अन्तर्राष्ट्रिय विमानस्थलमा स्वागत गर्न पार्टीका नेता तथा कार्यकर्ता पुगेका थिए ।
००००
भगवान् गणेशको पूजा आराधना गरी  गणेश चतुर्थी पर्व मनाइएको छ । सत्ययुगमा भाद्र शुक्ल चतुर्थीका दिन भगवान् गणेशको उत्पत्ति भएको शास्त्रीय मान्यता छ । 

यस अवसरमा शनिबार उपत्यकाका अशोकविनायक, चन्द्रविनायक, सूर्यविनायक, कमलविनायक, धनगणेश, जलविनायक, कार्यविनायक, कमलादी गणेशलगायत देशभरका गणेश मन्दिरमा विशेष पूजा गरी पर्व मनाइएको हो ।
००००
इराकस्थित संयुक्त राष्ट्रसंघीय गार्ड युनिट तेह्रौँ डफ्फा सहभागी हुन सहसेनानी मोहन सलामी मगरको नेतृत्वमा १९ सदस्यीय नेपाली शान्ति सैनिकहरूको टोली शुक्रबार मिसन इलाकातर्फ प्रस्थान गरेको छ ।  
००००
रास्वपाका उपसभापति डोलप्रसाद अर्यालले देश बनाउनका लागि हजारौँ रवि लामिछानेहरू जन्माउनुपर्ने बताएका छन् ।

शनिबार पार्टीको सिन्धुली–काठमाडौँ सम्पर्क विभाग गठन कार्यक्रमलाई सम्बोधन गर्दै उपसभापति अर्यालले देश बनाउनका लागि एउटा रवि लामिछानेले मात्रै नसक्ने बताएका हुन् ।