भविश्यमा गाडी उत्पादन गर्ने परिकल्पनाः बुटवलमा अटो इन्जिनियरिङ कलेज सञ्चालन गर्ने योजना

भविश्यमा गाडी उत्पादन गर्ने परिकल्पनासहित बुटवल अटो इन्जिनियरिङ एशोसिएसनले अटो इन्जिनियरिङ कलेज सञ्चालन गर्ने योजना अघि सारेको छ । अबको पुस्तालाई अटो क्षेत्रमा आकर्षित गर्ने उद्देश्यले इन्जिनियरिङ पढाइ सञ्चालनका लागि प्रक्रिया अघि बढाएको हो । कलेज सञ्चालनका लागि भौगोलिक रुपमा सबैको पायक पर्ने बुटवललाई रोजिएको बताइएको छ । 

यसका लागि अटो इन्जिनियरिङ एशोसिएसनले शनिवार ‘बुटवल उपमहानगरपालिकाको बजेट व्यवस्थापनमा स्नातक तह अटो इन्जिनियरिङ कलेज सञ्चालन सम्भाव्यता’ विषयक प्रतिवेदन सार्वजनिक गरेको छ । 

एशोसिएसनका अध्यक्ष तुल्सीराम न्यौपानेले आफूले यो क्षेत्रमा ५ वर्ष काम गरेकाले अटो क्षेत्रमा सुरक्षित भविश्य देखेको बताए । उत्पादन र रोजगारलाई जोड्न कलेज आवश्यकता देखिएकोले प्रक्रिया अघि बढाइएको उनको भनाइ थियो । ‘कलेज सञ्चालनका लागि अहिलेको मौजुदा शिक्षा नीतिमा परिवर्तन हुनुपर्छ,’ न्यौपानेले भने, ‘अहिले यहाँ काम गर्नेहरूमध्ये अध्ययन गरेका कम छन् । यहाँ पढाइ सञ्चालन भए भविश्यमा हामी यातायात क्षेत्रमा आत्मनिर्भरदेखि गाडी उत्पादन गर्ने परिकल्पना गर्न सक्छौँ ।’

कलेज सञ्चालनका लागि ‘प्राक्टिकल बेस’ धेरै र सैद्धान्तिक कुरा कम गर्ने गरी कोर्स डिजाइन गरिएको छ । तर अझै यसको सम्बन्धनको विषयमा ठोस पहल हुन सकेको भने छैन । बुटवलमा प्राविधिक धारको अटो इन्जिनियरिङ कलेज आवश्यक रहेको विषयमा उपमहानरले पनि पटकपटक आवाज उठाउँदै आएको छ । बुटवलका इन्टिच्युटमा हाल मेकानिकल, अटो क्षेत्रको पढाइ डिप्लोमा (स्नातक) लेभलमा हुँदै आएको छ । बुटवल टेक्निकल इन्टिच्युट र कोरिया–नेपाल बहुप्राविधिक विद्यालयमा अध्यापन हुँदै आएको हो । तर स्नातक र स्नातकोत्तर तहका कुनै कलेज भने छैनन् । 

बुटवलमा रहेको अटो भिलेजमा हाल १ हजारभन्दा बढी व्यवसायी रहेका छन् । जसमा ८ हजारभन्दा बढी कर्मचारीले रोजगारी पाएको अटो इन्जिनियरिङ एशोसिएसनको तथ्यांकले बताउँछ । जसमा करिब २० प्रतिशत मात्रै डिप्लोमा लेभलको कोर्स पूरा गरेका दक्ष जनशक्ति रहेका छन् भने अन्य सबै अन्य विषय पढेका वा व्यावहारिक सीप र दक्षता भएका जनशक्ति रहेका छन् ।