लुम्बिनी प्रदेशसभा सदस्य केसी कारागार चलान

लुम्बिनी प्रदेशसभा सदस्य धनबहादुर केसी कारागार चलान भएका छन् ।

तीन दशकभन्दा पुरानो मुद्दा दोषी ठहर भएका केसीले जिल्ला अदालत रुकुम पूर्व आत्मसमर्पण गरेपछि उनलाई कारागार चलान गरिएको हो ।

रुकुमपूर्वका सहायक प्रमुख जिल्ला अधिकारी जीवनकुमार खड्काले केसी आफैं रुकुमकोट जिल्ला अदालतमा उपस्थित भएर आत्मसमर्पण गरेका जानकारी दिए । ​

रुकुमपूर्वमा कारागार नभएकाले उनलाई आइतबारनै रुकुमपश्चिम पठाइएको सहायक प्रमुख जिल्ला अधिकारी खड्काले लोकान्तरलाई जानकारी दिए ।

३३ वर्ष पहिले धनबहादुरलाई रुकुम जिल्ला अदालतले कीर्ते मुद्दामा दोषी ठहर गर्दै एक वर्ष कैद र दुई हजार रुपैयाँ जरिवानाको फैसला सुनाएको थियो ।

श्रीमतीसँगको अंश मुद्दामा प्रदेश सांसद केसीले कीर्ते गरेको अभियोगमा साबिक रुकुम जिल्ला अदालतले उनलाई दोषी ठहर गरेको थियो ।

केसी प्रदेशसभाको उम्मेदवार बन्नसमेत योग्य नभएको भन्दै उनको आलोचना हुँदै आएको थियो ।

उनी रूकुम पूर्वको प्रदेश (ख)बाट निर्वाचित नेपाली कांग्रेसका सांसद हुन् ।