दुग्ध क्षेत्र कृषि अर्थ व्यवस्थाको महत्त्वपूर्ण पक्ष हो : कृषिमन्त्री अधिकारी

कृषि तथा पशुपन्छी विकास मन्त्री रामनाथ अधिकारीले दुग्ध क्षेत्र नेपालको कृषि अर्थ व्यवस्थाको महत्त्वपूर्ण क्षेत्र भएको बताएका छन् ।

राष्ट्रिय दुग्ध विकास बोर्ड र केन्द्रीय दुग्ध सहकारी संघले आज ललितपुरमा आयोजना गरेको अन्तरक्रिया कार्यक्रममा कृषि मन्त्री अधिकारीले निजी र सरकारी दुवैले दुग्ध किसानको रकम भुक्तानी गर्नु  पर्नेमा जोड दिएका हुन् । ​

डीडीसीलाई सरकारले दिएको ६० करोड ऋण किसानकै हातमा जानुपर्नेमा उनले जोड दिए । 

मुलुकलाई दुग्ध उत्पादनमा आत्मनिर्भर बनाउन दुग्ध सहकारीहरूको भूमिका महत्त्वपूर्ण रहेको भन्दै मन्त्री अधिकारीले दुग्ध किसानले भोगेका समस्याहरूमा आफू जानकार रहेको बताए । समस्या समाधानमा मन्त्रालय लागि परेको उनको भनाइ छ ।

मन्त्री अधिकारीले दुग्ध विकास संस्थानलाई व्यावसायिक बनाउने कार्यको शुरूआत भइसकेको बताउँदै उनले यी निकायमा किसानलाई सहभागिता गराउने प्रतिबद्धता पनि  जनाए ।

हाल ६४ जिल्लामा १ हजार ८७५ वटा दुग्ध सहकारी संस्था रहेको र वार्षिक १० अर्ब रुपैयाँको कारोबार हुने गरेको केन्द्रीय दुग्ध सहकारी संघले जनाएको छ ।

दुग्ध किसान तथा  दुग्ध सहकारी संस्थाका प्रतिनिधिहरूले  पशु बीमाको सुनिश्चित नहुँदा पेशालाई निरन्तरता दिन अप्ठ्यारो परेको, ७ महिनादेखिको दूधको रकम भुक्तानीमा समस्या भएको, दिगो बजारको अभाव, दुग्ध पदार्थ अघोषितरूपमा आयात भइरहेको, सहकारी संस्थाले उद्योग सञ्चालन गर्न कानूनी जटिलता रहेको जस्ता समस्याहरू रहेको  बताएका छन् ।

उनीहरूले दूध संकलनमा सही तथ्यांक राख्न जरुरी रहेको सहज र  सुलभ ब्याज दरमा  बैंक तथा वित्तीय संस्थाहरूले लगानी गर्नुपर्ने, दुग्ध पदार्थ आयातमा कर बढाउनु पर्ने, कृषिमा दिइने अनुदान किसानकै हातमा पुर्‍याउनुपर्ने  लगायतका सुझाव दिएका छन् ।

दुग्ध विकास संस्थान र दुग्ध विकास बोर्डमा दुग्ध किसानको प्रतिनिधित्व हुन जरुरी रहेकोमा उनीहरूले जोड दिएका छन् ।

उनीहरूले दुग्ध विकास संस्थानलाई जोगाउन जरुरी रहेको पनि बताए ।