२६ जेठ २०८३, मंगलबार
गुटखा खाँदा क्यान्सर हुन्छ । गुटखाले क्यान्सर मात्रै होइन, अन्य धेरै समस्याहरू पनि निम्त्याउँछ ।
तर, गुटखा खाने बानीले एउटा दम्पतीलाई प्रहरीसम्म पुर्याएको छ । घटना भारतको उत्तर प्रदेश (युपी)को हो ।
इन्डिया टुडेका अनुसार यो जोडीले सन् २०२२ मा विवाह गरेका थिए । निजी कम्पनीमा काम गर्ने श्रीमानलाई गुटखा खाने लत थियो ।
श्रीमानले गुटखा खाँदाखाँदै श्रीमतीले पनि खान थालिन् । दुवैलाई लत बस्यो । त्यसपछि श्रीमतीले श्रीमानको गोजीबाट गुटखा चोरेर खान थालेको श्रीमानको भनाइ छ । यही विषयमा श्रीमान्–श्रीमतीबीच झगडा भएको थियो । कुरा बढेपछि श्रीमानले श्रीमतीलाई प्रहरीसम्म लगे । त्यसपछि श्रीमतीले श्रीमानविरुद्ध प्रहरीमा उजुरी दिएकी थिइन् । यो पारिवारिक मामिला भएकोले प्रहरीले दुवैलाई काउन्सिल गर्ने निर्णय गरेको थियो ।
श्रीमान्-श्रीमतीलाई पारिवारिक परामर्श केन्द्रमा पठाइएको थियो । काउन्सिलिङका क्रममा दुवैले आ–आफ्नो गुनासो राखेका थिए । पटक–पटक अस्वीकार गर्दा पनि श्रीमतीले गोजीबाट गुटखा चोरेको श्रीमानले बताए ।
तर, श्रीमतीले अलिकति गुटखा मात्र निकाल्ने बताइन् । काउन्सिलरले दुवैलाई गुटखा छाड्न सल्लाह दिएको बताए । दुवैले काउन्सिलरको अगाडि फेरि गुटखा नखाने वाचासमेत गरेका थिए ।
