पालुङटार २ मंसिर– दाइ डा. बाबुराम भट्टराईसँग अनुहार मिलेको भनेर माओवादी सशस्त्र जनयुद्धको समयमा उनलाई प्रहरीले पटक पटक नियन्त्रणमा लियो । नेपाल विद्युत प्राधिकरणका जागिरे शिवप्रसाद भट्टराई बाबुरामसँग अनुहार मिलेका कारण पटक पटक प्रशासनको निगरानीमा परे । 

गएको जेठमा प्राधिकरणको ३० बर्षे जागिरबाट अवकाश पाएपछि शिवप्रसाद अहिले दाजु बाबुरामको लागि भोट माग्दै गाउँ गाउँमा हिँडेका छन् । शनिवार गोरखाको पालुङटारमा आयोजित चुनावी सभाको व्यवस्थापनका लागि उनी पहिल्यै सभास्थलमा आइपुगेका थिए ।
 
‘विगतमा अर्थमन्त्री र प्रधानमन्त्री हुँदा दाजुले गरेको कामका कारण यहाँका स्थानीय जनता उहाँको पक्षमा खुलेर लागेका छन्,’ काठमाडौं कोटेश्वरका अस्थायी वासिन्दा शिवप्रसाद भन्छन्, ‘गोरखाली मतदाताले बाबुरामलाई छाडेर अरु विकल्प रोज्दैनन् ।’ 

शिवप्रसादले खोप्लाङबाट दाजुलाई भोट हाल्नेछन् । संविधान निर्माणका क्रममा राजनीतिक संवाद तथा सहमति समितिको सभापतिको रुपमा काम गरेको र संविधान कार्यान्वयन र समृद्धिसहित देशलाई नयाँ उचाइमा पुर्‍याउन बाबुरामको आवश्यकता हुने उनको दाबी छ ।
 
बाबुरामभन्दा ६ बर्ष कान्छा शिवप्रसाद आफू र अन्य कयौं व्यक्ति बाबुरामको प्रेरणाका कारण अध्ययनमा लागेको बताउँछन् । ‘विगतमा गरेका कामका कारण स्थानीय जनता बाबुरामसँग सुखी छन्,’ शिवप्रसादले थपे, ‘अहिले बुढीगण्डकी आयोजना बनाउन पनि बाबुरामले जित्नु पर्ने स्थानीयको भनाइ छ ।’

कांग्रेस वरिष्ठ नेता रामचन्द्र पौडेल लगायतले सम्वोधन गर्ने भनिएका कारण भवानी बहुमुखी क्याम्पस नजिकैको मैदानमा सर्वसाधारणको भीड लागेको छ । तीन दिनअघि यही स्थानमा भएको कार्यक्रममा माओवादी अध्यक्ष पुष्पकमल दाहाल प्रचण्डले बाबुरामको आलोचना गरेका थिए । 

बाबुरामको भाषण सुन्न खोप्लाङका ८१ बर्षीया डोलनाथ पोखरेल पालुङटार आएका छन् । ‘बाबुराम अर्थमन्त्री भएकै कारण यहाँ बाटो र पुल बने, किसानको ३० हजार ऋण मिनाहा भयो,’ पोखरेल भन्छन्, ‘गोरखाका लागि बाबुरामको विकल्प छैन ।’ उनले चुनाव जिते भने गोरखाको थप विकास हुने विश्वास लिएको बताए । 

अर्थमन्त्री रहेको समयमा बाबुरामले गोरखामा कयौ विकास योजना पारेका थिए । ‘पहिले पालुङटारको जग्गा १० हजार रोपनी थियो, अहिले २० लाख पर्ने भएको छ’ स्थानीय ६१ बर्षीय भक्तबहादुर रायमाझीले भने, ‘जो आएपनि हाम्रो रोजाइ बाबुराम नै हो ।’ 

केही दिन अघि यही स्थानमा भएको सभामा बाबुरामका सहपाठी डा. उपेन्द्र देवकोटाले भट्टराईको आलोचना गरेका थिए । ‘जसले जे भनेपनि गोरखाले बाबुराम जस्तो नेता पाएको छ, गोरखाको विकासका लागि जे गर्छन बाबुरामले नै गर्छन ।’