२६ जेठ २०८३, मंगलबार
पशुमा लाग्ने लम्पीस्किन रोगबाट कोशी प्रदेशमा एक हप्तामै १३९ पशु मरेका छन् । मर्नेमा गाईको संख्या बढी छ । एक सातामा १३६ वटा गाई मरेको पशुपंक्षी तथा मत्स्य विकास निर्देशनालय कोशी प्रदेशले जानकारी दिएको छ । तीनवटा अन्य पशु परेका हुन् ।
लम्पीस्किनबाट यसपटक गाईका साना बाछाबाछीहरू बढी प्रभावित भएको निर्देशनालयले जनाएको छ । यस वर्ष संक्रमण शुरू भएपछि ३३६ पशु मरेका छन् । त्यसमध्ये ३३० ओटा गाई हुन् ।
यो हप्तामात्र कोशी प्रदेशका १० जिल्लामा ३ हजार ७७८ पशुमा लम्पीस्किनको संक्रमण देखिएको छ । संक्रमण शुरू भएको दुई महिनाको अवधिमा १६ हजार ५१९ पशु संक्रमित भइसकेका छन् । जसमा १३६ ओटा भैंसीमा संक्रमण देखिएको पशुपंक्षी तथा मत्स्य विकास निर्देशनालय कोशीका निर्देशक डा. सुशिलकुमार अधिकारीले जानकारी दिए । उनले माउ गाईमा भने यस पटकको संक्रमण कम देखिएको र बाछाबाछीमा बढी संक्रमण देखिएको बताए ।
सोलुखुम्बु, ओखलढुंगा, संखुवासभा र तेह्रथुममा लम्पीस्किनको संक्रमण फेला परेको छैन । बाँकी १० जिल्लामा रोगका संक्रमण फैलिएको छ । त्यसमध्ये झापामा सबैभन्दा बढी संक्रमण देखिएको छ ।
झापा जिल्लामा ४ हजार २४ पशुमा संक्रमण देखिएको निर्देशनालयले जनाएको छ । यसमध्ये ३ हजार ९९९ गाई र २५ भैंसी छन् । झापामा यस रोगका कारण ११२ पशुको मृत्यु भएको छ । जसमा १०५ गाई र ७ भैंसी छन् । संक्रमण नियन्त्रणका लागि झापामा ८ हजार ३८५ पशुमा खोप लगाइएको छ ।
सुनसरीमा ४ हजार संक्रमित पशु छन् । यसमध्ये ३ हजार ९८४ गाई र १६ भैंसी छन् । सुनसरीमा ७१ पशुको मृत्यु भएको छ, जसमा ६८ गाई र ३ भैंसी छन् । सुनसरीका ११ हजार ४८१ पशुमा खोप लगाइएको छ ।
मोरङमा ३ हजार ७१६ पशुमा संक्रमण देखिएको छ । जसमध्ये ३ हजार ७०४ गाई र १२ भैंसी छन् । मोरङमा ६४ पशुको मृत्यु भएको छ, जसमा ६३ गाई र एउटा भैंसी रहेको छ । मोरङमा११ हजार ६०४ पशुमा खोप लगाइएको छ ।
न्यूनतम संक्रमण भएका जिल्लामा उदयपुरमा ४२५ पशुमा संक्रमण देखिएको छ । यसमध्ये ४१० गाई र १५ भैंसी छन् । उदयपुरमा ८ पशुको मृत्यु भएको छ र ४ हजार ४४७ पशुमा खोप लगाइएको छ ।
इलाममा ३९६ पशुमा संक्रमण देखिएको छ, जसमा ३८१ गाई र १५ भैंसी छन् । इलाममा ५ पशुको मृत्यु भएको छ भने ५ हजार ३७६ पशुमा खोप लगाइएको छ ।
भोजपुरमा ३७६ पशुमा संक्रमण देखिएको छ, जसमध्ये ३७५ गाई र एउटा भैंसीमा संक्रमण भेटिएको छ । भोजपुरमा ७ पशुको मृत्यु भएको छ र ३ हजार २५७ पशुमा खोप लगाइएको छ ।
एक सातामा ५६ हजार ७१ पशुमा लम्पीस्किनविरुद्ध खोप लगाएर रोगको संक्रमण नियन्त्रण गर्ने प्रयत्न सरकारले गरेको छ । यस वर्ष कोशी प्रदेशका २ लाख ६२ हजार ६०९ पशुमा खोप लगाइएको निर्देशक अधिकारीले जानकारी दिए ।
