काठमाडौं, २३ मंसिर– गोरखा–२ बाट वाम गठवन्धनका साझा उम्मेदवार माओवादी केन्द्रका प्रभावशाली नेता नारायणकाजी श्रेष्ठले आफ्नै पूर्वसहकर्मी डा. बाबुराम भट्टराईसँग पराजित भएका छन् । 

नेकपा माओवादीले शुरु गरेको ‘जनयुद्ध’को उद्गमथलो मानिने गोरखामा माओवादी नेताको हारलाई धेरैले आश्चर्यका रुपमा पनि लिएका छन् । तर ‘जनयुद्ध’को नेतृत्वकर्ता मध्येका एक माओवादीका पूर्व नेता बाबुराम भट्टराईले चुनाव जित्नु पनि धेरै असमान्य नरहेको कतिपयको टिप्पणी छ । बाबुरामले गोरखाबाट यसअघि २०६४ र २०७० मा चुनाव जितेका थिए । तेस्रो पटक चुनाव जितेर यो वर्ष बाबुरामले ह्याट्रिक गरेका छन् । 

बाबुरामसँग पराजय ब्यहोरेका माओवादी नेताले आफ्नो हार स्वीकार्दै दुखी नभएको बताएका छन् । सामाजिक सञ्जाल ट्वीटरमा स्टाटस लेख्दै नेता श्रेष्ठले एमाले र माओवादीको वाम गठवन्धनले देशभर विजयी हासिल गर्दा आफू खुसी रहेको श्रेष्ठको भनाइ छ । 

‘मैले सधै नेपाली कम्युनिष्ट आन्दोलनको एकीकरण र वाम गठबन्धनको पक्षमा प्रयत्न गरिरहें । व्यक्तिगत रुपमा मेरो पराजय भए पनि वाम गठबन्धनको शानदार विजयबाट म अत्यन्त खुसी छु । मेरा लागि यो नै ठूलो बिजय हो । बाम सरकारद्वारा समाजवाद उन्मुख समृद्धि हाँसिल गर्न र पार्टी एकता सफल पार्न लागिपर्नेछु,’ श्रेष्ठले ट्वीटरमा लेखेका छन् ।