काठमाडौं, २९ मंसिर– मंसिर १० र २१ गते सम्पन्न प्रदेश तथा प्रतिनिधिसभा निर्वाचनअन्तर्गत समानुपातिकतर्फको चार जिल्लाको करिव १० लाख मतगणना गर्न बाँकी रहेको छ । मतगणना आज सम्पन्न हुने निर्वाचन आयोगले जनाएको छ । 

मतगणना जारी रहेका जिल्लामा सुनसरीको क्षेत्र नं. २ र ३, सर्लाहीको क्षेत्र नं. २ र ३, सुर्खेतको क्षेत्र नं. १ र कैलालीको क्षेत्र नं. १ को मतगणना जारी रहेको आयोगको संयुक्त निर्वाचन सञ्चालन केन्द्रले जनाएको छ । अहिलेसम्मको मतपरिणामअनुसार प्रतिनिधि सभामा ५ वटा दलले मात्र राष्ट्रिय दलको मान्यता पाउने संभावना देखिएको छ । 

आयोगको सूचना प्रणाली व्यवस्थापन शाखाबाट प्राप्त पछिल्लो मत परिणाम अनुसार, नेकपा एमालेले ३० लाख १० हजार ८९६ मत प्राप्त गरी अग्र स्थानमा छ । नेपाली काँग्रेसले २९ लाख ३७ हजार ९२२ मतका साथ दोस्रो र नेकपा (माओवादी केन्द्र) ले १२ लाख ९ हजार ८०१ मत ल्याएर तेस्रो स्थानमा रहेको छ ।

यसैगरि संघीय समाजवादी फोरम, नेपालले ४ लाख २६ हजार १५, राष्ट्रिय जनता पार्टी, नेपालले ३ लाख ९९ हजार ५८२, विवेकशील साझा पार्टीले २ लाख ६६७, राष्ट्रिय प्रजातन्त्र पार्टीले १ लाख ८९ हजार ८०९, राष्ट्रिय प्रजातान्त्रिक पार्टी (प्रजातान्त्रिक) ले ८४ हजार ६४, नयाँ शक्ति पार्टी, नेपालले ७८ हजार १४६, नेपाल मजदुर किसान पार्टी ५२ हजार ९१९ र अन्य दलले ३ लाख २५ हजार ८६३ मत प्राप्त गरेका छन् । 

समानुपातिक तर्फको गणना आज सकिएपछि मात्र कुन दलले राष्ट्रिय दलको मान्यता पाउने भनी उल्लेख गर्ने निर्वाचन आयोगले जनाएको छ । प्रत्यक्षमा एक–एक सिट जितेका नयाँ शक्ति, राप्रपा, नेपाल मजदुर किसान पार्टी र राष्ट्रिय जनमोर्चाले ३ प्रतिशत मत ल्याउन कठिन देखिएको छ ।