महेन्द्रनगर, १२ फागुन–  कञ्चनपुरकाे भीमदत्त नगरपालिकाले निर्माणा गरेका कानून राजपत्रमा प्रकाशित गरी कार्यान्वयन सुरु गरेको छ । भीमदत्त नगरपालिकाको नगर सभा र नगर कार्यपालिकाबाट पारित कानून स्थानीय राजपत्रमा प्रकाशित गरेकाे हाे ।

ती कानूनमा विनियोजन ऐन सहित नियमावली, निर्देशिका र कार्यविधि छन् । नगरसभा र नगर कार्यपालिकाबाट पारित कानून नगर प्रमुख सुरेन्द्र विष्टले प्रमाणिकरण गरेपछि राजपत्रमा प्रकाशित गरिएका छन् । भीमदत्त नगरपालिका कार्यालयले स्थानीय सरकार सञ्चालन ऐन २०७४ अनुसार शुक्रबार एक दर्जन कानून स्थानीय राजपत्रमा प्रकाशित गरेको हो ।

स्थानीय सरकार सञ्चालन ऐन २०७४ को दफा १०२ को उप दफा २ मा स्थानीय सरकारलाई कानून बनाउने अधिकार र सोही दफाको उप दफा ३ मा राजपत्रमा प्रकाशित गर्नु पर्ने प्रावधान छ । भीमदत्तका मेयर सुरेन्द्र विष्टले स्थानीय सरकारको क्षेत्राधिकारभित्र रहेर नगर सभा र नगर कार्यपालिकाबाट पारित ऐन, नियमावली, निर्देशिका र कार्य विधि राजपत्रमा प्रकाशन गरिएको बताए । ‘स्थानीय सरकार सञ्चालन ऐन अनुसार निर्माण गरिएका कानुन राजपत्रमा प्रकाशित गरी कार्यान्वयनको चरणमा प्रवेश गरेका छौ’ नगर प्रमुख विष्टले भने ।

छाडा चौपाया नियन्त्रण तथा व्यवस्थापन निर्देशिका, विनियोजन ऐन, नगर कार्यपालिका बैठक सञ्चालन सम्बन्धी कार्य विधि, नगर कार्यपालिका कार्य सम्पादन नियमावली, नगर कार्यपालिका कार्य विभाजन नियमावली, उपभोक्ता समितिको गठन, सञ्चालन र व्यवस्थापन सम्बन्धी कार्यविधि, टोल विकास संस्था गठन तथा सञ्चालन कार्यविधि, अल्पकालिन नगर सेवा केन्द्र सञ्चालन कार्यविधि मदिरा बिक्री, वितरण व्यवस्थापन तथा नियमन कार्यविधि, घ वर्गको निर्माण व्यवसायको नयाँ इजाजत पत्र जारी, नविकरण, नामसारी खारेज गर्ने सम्बन्धी कार्य विधि, ज्येष्ठ नागरिक परिचय पत्र वितरण कार्यविधि र आधारभूत तहको परीक्षा सञ्चालन सम्बन्धी कार्यविधि राजपत्रमा प्रकाशित गरिएको छ ।

भीमदत्त नगर कार्यालयका सूचना अधिकारी प्रशासकीय अधिकृत हरि सिह धामीले स्थानीय सरकार सञ्चालन ऐन अनुसार नगर सभा र कार्यपालिकाबाट पारित कानुन कार्यान्वयनका लागि राजपत्रमा प्रकाशित गर्नु पर्ने व्यवस्था प्रकाशित गरिएको जानकारी दिए ।