विराटनगर, १६ फागुन– भन्सार शुल्क बैंकमा दाखिला नभएपछि प्रहरीले व्यवसायीहरुसँग त्यससँग सम्बन्धित विवरण माग गरेको छ । 

राष्ट्रिय बणिज्य बैंक सुख्खा बन्दरगाहा रानीमा राजश्व वापतको ९ करोड ६१ लाख ५५ हजार रुपैयाँ दाखिला नभएको पाईएपछि प्रहरीले व्यवसायी कम्पनीहरुसँग विवरण माग गरेको हो । 

व्यवसायीले एजेण्टलाई दिएको रकमको विवरणसहितका बिभिन्न प्रश्नहरुसहित व्यवसायिलाई विवरण माग गरिएको प्रहरीले जनाएको छ । तर अहिलेसम्म चार जना व्यवसायीले मात्र विवतरण बुझाएका छन् । 

प्रहरीले उक्त एकाउण्टबाट मोरङ, सुनसरी, झापा, पर्सा र काठमाण्डौ लगायतका बिभिन्न ४९ वटा कम्पनी तथा व्यवसायीहरुको नामबाट कारोवार भएको जनाएको छ । त्यो मध्य ४६ वटा कम्पनी तथा व्यवसायीहरुको कारोवार सुरेश क्लियरिङ एण्ड फरवार्डिङ सर्भिसको नामबाट भएको देखिएको र सम्पूर्ण कम्पनी तथा व्यवसायीहरुलाई उक्त कारोवारको भुक्तानि सम्बन्धमा यथास्थिति विवरण मात्र माग गरि अनुसन्धानमा सहयोग गर्न भनिएको मोरङका प्रहरी उपरीक्षक अरुण कुमार बिसीले जानकारी दिए । 

गत फागुन २ गते बाणिज्य बैक विराटनगर बन्दरगाहा शाखामा कर्मचारी मिलेमत्तोमा ९ करोड ६१ लाख ५५ हजार दाखिला नभएको पाईएपछि प्रहरीले भन्सार एजेण्ट करोवार गर्ने ब्यवसायीहरुसँग विवरण मागेको हो । 
सुरेश क्लियरिङ एण्ड फरवार्डिङ सर्भिसका प्रोप्राईटर विराटनगर ७ का सुरेश बोहोरा, सोही कम्पनीका विराटनगर ७ का  एजेण्ट ललित बोहोराले बैंकमा रकम बुझाउँदा वाउन्स चेक  दिएका थिए । कर्मचारीको मिलेमतोमा राष्ट्रिय बाणिज्य बैक शाखा कार्यालय सुख्खा बन्दरगाहा भन्सार काउन्टर इन्चार्ज बरिष्ठ सहायक तोर्णराज राउत बिरुद्ध पनि उजुरी परेको थियो । राष्ट्रिय बाणिज्य बैंक शाखा कार्यालय रानी बिराटनगरका निमित्त प्रबन्धक राजेश डंगोलले उनीहरुको बिरुद्ध जाहेरी  दिएका थिए । 

बोहरा दाजुभाई फरार भएपछि अनुसन्धानका क्रममा व्यापारीसँग विवरण माग गरिउको हो । सुख्खा बन्दरगाहा कार्यालयमा अवस्थित भन्सार काउन्टर मार्फत भन्सार कार्यालयको प्रज्ञापन पत्र बमोजिमको भन्सार दस्तुर बापतको रकम भन्सार क्लियरिङ प्रयोजनार्थ भन्सार कार्यालयको खातामा जम्मा गर्ने र बैंकले भन्सार तिरेको रसिद दिने चलन रहेको छ । तर यो क्रम बैकका कर्मचारी र भन्सार एजेन्टहरु मिलेर भन्सार कार्यालयको खातामा जम्मा गर्नु पर्ने रकम ९ करोड ६१ लाख ५५ हजार नोक्सानी गरेको प्रहरीको अनुसन्धानबाट देखिएको प्रहरी उपरीक्षक विसीले जानकारी दिए ।  

यो रकम २०७४ पुस ९ गते देखि माघ १९ गते सम्म ८ वटा एकाउन्ट पेयी वाउन्स चेकको हो । यही मितिमा १८ करोड ४० लाख ४४ हजार ७ सय ६५ रुपैयाँ भने सोही तिनै एजेण्ट मार्फत जम्मा भएको देखिएको छ । ९ करोड ६१ लाख ५५ हजार भने ८ वटा वाउन्स चेकको आधारमा बैकलाई नोक्सानी पु¥याएको देखिएको प्रहरीले जनाएको छ । 

प्रहरीका अनुसार नविल बैंकको १, सिटिजन बैंकको ३, एभरेष्ट बैंक १, नेपाल एस बि आई वैंकको १, सिद्दार्थ बैंकको १ र नेपाल बंगलादेश बैंकको १ गरि जम्मा ८ वटा चेक वाउन्स भएको बिसीले जानकारी दिनुभयो । सबै चेक बैंकका कर्मचारीले भन्सार क्लियरेन्स रिसिप्ट भन्सार एजेन्टलाई दिएको तर उक्त चेकहरुमा पर्याप्त रकम नभएको कारण बैंकलाई ९ करोड ६१ लाख ५५ हजार बराबरको हानि पु¥याएको भन्दै प्रहरीले २ जना कर्मचारीलाई पक्राउ गरी अनुसन्धान गरिरहेको छ । गुड फर पेमेन्ट वा मेसेन्जर चेक लिनु पर्नेमा त्यसो नगरेको प्रहरीको भनाइ छ । 

पक्राउ पर्नेमा भोजपुर नगरपालिका ४ का सुख्खा बन्दरगाहा रानी बिराटनगरका भन्सार काउण्टर इन्चार्जको बैकका वरिष्ठ सहायक तोर्णराज राउत र राष्ट्रिय बाणिज्य बैंक बन्दरगाहा शाखा प्रमुख विष्णुप्रसाद निरौला आजै प्रहरीले सार्वजनिक गरेको हो । उनीहरुले  भन्सार एजेण्ट सँग मिलेर बैकिङ कसुर गरेको प्रहरीले जनाएको छ । पक्राउ परेका दुबैलाई उच्च अदालत बिराटनगरमा पेश गरि म्याद थप गरि अनुसन्धान थालिएको छ ।  आज बिहान मात्र लोकान्तरले घटना सार्बजनिक नगरेको बारेमा समाचार प्रकाशन गरे लगत्तै  प्रहरीले घटनालाई पत्रकार सम्मेलन गरि सार्वजनिक गरेको हो । 

प्रतिवादी तोर्णराज राउतको वयानको आधारमा बैंकका शाखा प्रबन्धक बिष्णु प्रसाद निरौलालाई पक्राउ गरिएको हो । भन्सार एजेन्ट ललित बोहरा र सुरेश बोहोरा भने फरार रहेका छन् । उनीहरुको बिषयमा खोजी भईरहेको छ । 

पक्राउ परेका ६० दिनसम्म हिरासतमा

प्रहरीले पक्राउ गरेका २ जना राउत र निरौलालाई ६० दिनसम्म अनुसन्धान गर्न सक्ने छ । अनुसन्धानका आधारमा प्रहरीले  बैकिङ कसुर र सजाय ऐन २०६४ अनुसार मुद्दा दायर गर्ने जनाईएको छ । उनीहरु दोषि ठहर भए कसुरको आधारमा १० करोडसम्म बिगो भराउने तथा ४ देखि ६ बर्षसम्म जेल जान सक्ने कानूनी ब्यवस्था भएको प्रहरीले जनाएको छ । 

विराटनगर भन्सारमा १० करोड घोटाला–वाणिज्य वैंकका दुई जना कर्मचारी पक्राउ