काठमाडौं, १८ वैशाख – उत्तर कोरियाको सर्वोच्च नेता बन्नु लर्तरो कुरा हैन किनकि त्यसो बन्नका लागि खास वंशमा जन्मनुपर्छ । त्यसलाई बेकडू वंश भनिन्छ । 

आधिकारिक रूपमा किम जोङ–उन त्यही बेकडू वंशका हुन् । 

मान्यताअनुसार, यो वंश चीन र उत्तर कोरियाबीच एक सक्रिय ज्वालामुखीसँग जोडिएको छ । उत्तर कोरियाका पछिल्ला तीन सर्वोच्च शासक यही वंशका हुन् । 

यो ज्वालामुखी क्षेत्रलाई उत्तरदेखि दक्षिण कोरियासम्म पवित्र स्थान मानिन्छ । दुवै देशका लागि यसको आध्यात्मिक महत्त्व छ । 

यसको आध्यात्मिक महत्त्वको अनुमान अघिल्लो हप्ताको घटनाबाट लगाउन सकिन्छ । अघिल्लो शुक्रवार उत्तर कोरियाली शासक किम र दक्षिण कोरियाका राष्ट्रपति मून जे–इनबीचको ऐतिहासिक भेटवार्तामा यो ज्वालामुखीको चर्चा चलेको थियो । 

दक्षिणका राष्ट्रपति मूनले किमलाई यस पवित्र स्थानमा जाने इच्छा देखाए । किमले भने, ‘त्यहाँ पुग्ने खराब बाटोका कारण म लज्जित छु ।’

उत्तर कोरियाली नेताले यस्तो कुरा स्वीकार गर्नु दुर्लभ घटना हो । 

चीनमा चंगबाई नामले चर्चित यो पर्वतको उँचाइ २,७४४ मिटर छ र यो नै कोरियाली प्रायद्वीपको सबभन्दा अग्लो पर्वत हो ।

भौगोलिक रूपमा यो पर्वत महत्त्वपूर्ण छ । केही वर्षअघि वैज्ञानिकहरूले यस ज्वालामुखीमा हुने विस्फोटको आँकलन गर्नका लागि जाँच गरेका थिए । 

उत्तर कोरियाली नेतृत्वमाथि निगरानी गर्ने संस्थाका निर्देशक माइकल मेडन भन्छन्, ‘यहाँ सबै कोरियालीहरूको उत्पत्ति भएको मानिन्छ जसले गर्दा यो एक ऐतिहासिक स्थान हो ।’

बेकडू पर्वत उत्तर कोरियाको कोट अफ आर्म्स र राष्ट्रगानको पहिलो अनुच्छेदमा पनि भेटिन्छ ।

मेडनका अनुसार, किम र उनको परिवार यो पर्वतसँग जोडिनुको कारण यसको एक किसिमको राष्ट्रिय पहिचान पनि हो । 

ज्वालामुखीसँगको पहिलो सम्बन्ध किमका हजुरबुवा किम इल सुङबाट शुरु हुन्छ । उनले उत्तर कोरियामा साम्यवादी शासन स्थापना गरेका थिए । 

इल सुङले बेकडू पर्वतमा नै जापानी साम्राज्यवादी शक्तिहरूविरुद्ध गुरिल्ला युद्ध लडेका थिए । त्यतिखेर कोरियामा जापानको कब्जा थियो ।

त्यसपछि नै यो मिथकको शुरुआत भयो र किम जोङ–इलको समयमा यो भ्रम बढाइयो । 

जोङ–उन पनि बेकडू पर्वतबाट निस्केका तिनै वीरहरूको वंशमा उत्पन्न भएका हुन् भन्ने दाबी गरिन्छ । 

चीन र उत्तर कोरियाबीच यस पर्वतको सीमाका विषयमा विवाद भएको थियो तर सन् १९६२ मा दुवैका बीच भएको सम्झौतापछि अब यो एक पर्यटकीय गन्तव्य बन्न पुगेको छ । 

उत्तर कोरियाको आधिकारिक मिडियामा किमले बेकडू पर्वतमा उभिएर खिचाएका तस्वीरहरू प्रकाशित भएका छन् । उनले सन् २०१३ र २०१७ मा ती तस्वीर खिचाएका थिए ।

बीबीसी हिन्दीबाट