काठमाडौं, २० वैशाख –नेकपा एमाले र माओवादी केन्द्रका दुई अध्यक्ष एकताको विषयमा सहमति नजिक पुगेका छन् । 

यसअघि विबाद भनिएका माओवादी जनयुद्ध, केन्द्रीय समितिको समायोजन लगायतका बिषयमा सहमति जुटिसकेको एमाले माओवादीका नेताले जनाएका छन् ।

सहमतिको अन्तिम प्रयास स्वरुप प्रधानमन्त्री एवं नेकपा एमालेका अध्यक्ष केपी शर्मा ओली र माओवादी केन्द्रका अध्यक्ष पुष्पकमल दाहाल प्रचण्डबीच बिहीवार छलफल भएको छ । प्रधानमन्त्री निवास बालुवाटारमा जारी छलफलमा नेताहरुको व्यबस्थापनबारे छलफल भइरहेको सहयोगीहरुले जनाएका छन् । 

स्रोतका अनुसार दुई पार्टीबीच ६०/४० को अनुपातमा एकता गर्ने मोटामोटी सहमति भएको छ । ‘दुई पार्टीबीच सम्मानजनक एकता गर्ने सहमति भएको छ,’ प्रचण्ड निकट एक नेताले भने,‘बराबरीमा ५/७ प्रतिशत तलमाथि हुनसक्छ ।’

दुई अध्यक्षले सामूहिक नेतृत्व गर्ने बिषयमा यसअघि नै सहमति भइसकेको थियो । तत्कालका लागि महाधिवेशन आयोजक समिति बनाएर जानेबारे सहमति भएको छ । 

माओवादी प्रवक्ता पम्फा भुसालले एकता सकारात्मक दिशामा अगाडि बढेको बताइन् । ‘एकता सम्मानजनक हुन्छ’ प्रवक्ता भुसालले लोकान्तरसंग भनिन् ‘एकता घोषण सम्बन्धी निर्णय छिट्टै हुन्छ ।’

दुई पार्टीबीच ९ वैशाखमा पार्टी एकता गर्ने भनिएपनि कतिपय प्राविधिक बिषय मिल्न नसक्दा सो मितिमा एकता हुन सकेको थिएन । प्रचण्डले आगामी महाधिवेशनबाट आफू अध्यक्ष बन्ने सुनिश्चितता खोजेकोले एकतामा ढिलाइ भएको एमाले नेताहरुले बताउँदै आएका थिए । 

उच्च राजनीतिक स्रोतका अनुसार वैशाख २२ गते मार्क्स जयन्तीका अवसर पारेर दुई पार्टी एकताको घोषणा गर्ने तयारी गरिएको छ । 

वैशाख ९ गते लेनिन जयन्तिको अवसरमा माओवादी अध्यक्ष पुष्पकमल दाहाल प्रचण्डले नभनिएको दिन पार्टी एकता गर्ने बताएका थिए । घोषणा गर्दा भाड्ने तत्वहरु सक्रिय रहेने उनको भनाइ थियो ।

पार्टी एकता गर्ने भन्दै दुई दलले गत वर्षको असोज १७ गते वामपन्थी गठबन्धन बनाएर चुनाव लडेका थिए ।