२६ जेठ २०८३, मंगलबार
विराटनगर, १७ जेठ– ३८ किलो सुन तस्करी काण्डका अभियुक्त नेपाल प्रहरीका निलम्बित एसएसपी श्याम खत्री पुर्पक्षका लागि जेल चलान भएका छन् । बिहीवार विहान जिल्ला अदालत मोरङमा उपस्थित भएका खत्रीलाई अदालतले पुर्पक्षका लागि जेल चलान गर्ने आदेश दिएको हो ।
बिहीवार अदालतमा उपस्थित भएसँगै खत्रीको बयान लिइएको थियो । बयान सकिएसँगै शुरु भएको थुनछेक बहस पछि अदालतले खत्रीलाई पुर्पक्षका लागि थुनामा राख्न आदेश दिएको हो ।
खत्री २२ पुस २०७३ मा त्रिभुवन अन्तर्राष्ट्रिय विमानस्थल बाहिरबाट बरामद भएको साढे ३३ किलो सुन प्रकरणमा पनि मुछिएका थिए ।
प्रहरी बर्दीमै रहेका बेला पक्राउ परेका एसएसपी खत्री त्यतिबेला जिल्ला अदालत काठमाडौंमा २ लाख रुपैयाँ धरौटी बुझाएर रिहा भएका थिए ।
गत माघ ९ गते त्रिभुवन अन्तर्राष्ट्रिय विमानस्थलबाट भित्रिएर हराएको भनिएको तस्करीको साढे ३३ किलो सुन र त्यसअघि भएका सुन तस्करीमा खत्रीको संलग्नता देखिएको भन्दै गृह मन्त्रालयका सह–सचिव नेतृत्वको समितिले उनलाई खोजी सूचिमा राखेको थियो । तर खत्री भने गत चैत तेस्रो हप्तादेखि फरार थिए ।
आफू कार्यरत प्रहरी प्रधान कार्यालयबाट १० दिनको विदा स्वीकृत गराएर भारत गएका खत्री बिहीवार काठमाडौं हुँदै जिल्ला अदालत मोरङ पुगेका थिए ।
खत्रीले बिहीवार मोरङ अदालतमा दिएको बयानमा सुन नै बरामद नभएको अवस्थामा कसैलाई तस्कर भन्न नमिल्ने बताए । उनले त्रिभुवन विमानस्थलबाट हुने सुन तस्करीमा तत्कालीन प्रहरी नायव महानिरीक्षक (डिआईजी) गोविन्द निरौलाको संलग्नता रहेको पनि बयानमा उल्लेख गरेका छन् ।
सुन तस्करीका नाइके भनिएका चूडामणि उप्रेती (गोरे) र तत्कालीन डिआईजी निरौलाबीच विशेष सम्बन्ध भएका कारण आफूले विमानस्थलमा कार्यरत रहँदा सुन तस्करी रोक्न नसकेको खत्रीले बयानमा उल्लेख गरे ।
