सुर्खेत- कर्णाली प्रदेशका सांसदहरुले जनताले भोगिरहेका समस्या समाधान सरकार उदासीन भएको आरोप लगाएका छन् । 

आइतबार बसेको दोश्रो अधिवेशनको छत्तिसौं वैठकमा विशेष समय लिएर बोल्ने अधिकांश सांसदहरुले आफूहरुले संसदमा उठाएका सार्वजनिक महत्त्वका विषयलाई सरकारले  पुरा गरे÷ नगरेको जानकारी नपाएको भन्दै आक्रोश पोखे । 

जाजरकोटका सांसद गणेशप्रसाद सिंहले भेरी नगरपालिकाको वडा नं. ४ मा रहेको ठाँटी बजारमा आइतबार विहान आएको पहिरोल दुई घर पुरेको र एक घरलाई आधा भत्काउँदा ७ जनाको ज्यान गएको भएपनि प्रदेश सरकारले उद्धारमा सहायता नगरेको आरोप लगाए । 

‘बारम्बार हामीले संसदमार्फत सरकारलाई जानकारी दिदाँ पनि सरकार उदासिन हुनु दुखद् हो, उनले भने, अझैपनि ७० घर पहिरोको उच्च जोखिममा छन्, सरकारले ती वस्तिलाई सुरक्षित स्थानमा सार्न पहल गरोस् ।’ 

सांसद सिंहले पहिरोमा परि ज्यान गुमाएकाहरुको परिवारलाई तत्काल राहत र घाइतेको उपचार गराउन सरकारसँग माग गरे । 

अर्का सांसद कृष्णा शाहले उक्त घटनाले जाजरकोट पुरै शोकमग्न भएकोे भन्दै सरकार मुकदर्शक बनेको आरोप लगाइन् । 

‘हामी अहिले शोकमा छौं, परिवारै विनाश भएको छ, तर सरकार दर्शक मात्रै बनेर बसेको छ’ उनले भनिन्, ‘यदी यस्तै हुने हो भने, सरकारको रवैया यस्तै हुने हो भने अभिभावकीय भूमिका कसले निर्वाह गर्ने ?’

सांस शाहल सरकारले तत्काल राहतको व्यवस्था गर्नुपर्नेमा जोड दिइन् । 

सांसद कौशिल्यावती खत्रीले सरकारले जाजरकोट लगायत अन्य क्षेत्रमा पीडित बनेका जनताको उपचार, राहत एवं उद्धारमा ध्यान दिन नसकेको आरोप लगाइन् । सरकारले अभिभावकत्व ग्रहरण गर्न नसकेको उनको भनाइ थियो । 

सांसद चन्द्रबहादुर शाहीले मुगुको खत्याड गाँउपालिका वडा नं. ४ जिउकामा किसानको गोठमा पहिरो खस्दा करिब ७० ओटा गाइबस्तु मरेका भन्दै जनताका हरेक पीडामा सरकारले मल्हम लगाउनु पर्ने बताए । 

सांसद पदमा खड्काले राजधानी व्यवस्थित गर्न प्रदेश सरकारले के गरिरहेको छ ? भन्दै सरकारलाई प्रश्न गरिन् । 

‘राजधानी नै डुवानमा परेको छ, विद्यालयहरु बन्द भएका छन्, एम्बुलेन्स पनि जान सकेको छैन’ उनले भनिन्, ‘राजधानी व्यवस्थापन गर्ने बारेमा सरकारले के गरेको छ, संसदलाई जानकारी दिनुपर्छ ।,’ 

खोलाका किनारहरु अतिक्रमण भइरहेका कारण वीरेन्द्रनगरका केही स्थानहरु बाढी पहिरोको उच्च जोखिममा रहेको बताउँदे सांसद खड्काले अतिक्रमण हटाउन सरकारले अभियानको थालनी  गनुृपर्ने सुझाव दिइन् । 

सांसद मिनासिंह रखालले बालविवाह कै कारण आत्महत्या बढेको बताइन् । एउटा घटना सुनाउँदै रखालले भनिन्,‘केही दिनअघि किशोर–किशोरीले भागी विहे गरेका तर कानूनका कारण उनीहरुको विवाह अवैध थियो ।  उनीहरु अर्कै घरमा अलग भएर बसे तर अविर शर्माले किशोरी पवित्रा शाही संग बसेको फोटो उनका प्रेमी सुशान्त ठकुरीलाई शर्माले म्यासेन्जरमा पठाएकाले पवित्राले आत्महत्या रोज्न पुगिन् । यदी यो  कुरा सत्य हो भने आत्महत्या गर्न बाध्य बनाउने अविर शर्मालाई  कडा कारवाही होस् ।

यसैबीच, आइतबारको संसद वैठकमा कर्णाली प्रदेशका आन्तरिक मामिला तथा कानून मन्त्री नरेश भण्डारीले प्रशासकीय कार्यविधी नियमित गर्ने सम्वन्धमा व्यवस्थागर्न बनेको विधेयक, २०७५ सभासमक्ष सैद्धान्तिक छलफलका लागि प्रस्तुत गरेका थिए । यस्तै सभामुख राजबहादुर शाहीले कर्णाली प्रदेश सभा सचिवालय सम्वन्धमा व्यवस्था गर्न बनेको विधेयक २०७५ विधायन तथा प्रदेश मामिला समितिमा पठाउनका लागि निर्णर्याथ प्रस्तुत गरेका थिए ।