पोखरा - विपक्षीका दर्जनौं प्रहारमा गोल किपर राजु नगरकोटी 'चुम्बक' बन्दा एपीएफ क्लब छैटौं मनकामना केबलकार पोखरा कप फुटबल प्रतियोगिताको फाइनल पुगेको छ ।

पोखरा रंगशालामा शुक्रबार भएको पहिलो सेमिफाइनलमा १२० मिनेटको खेल गोलरहित बराबरी खेलेको एपीएफले अन्ततः टाइब्रेकरमा जापानको रिस्सो युनिभर्सिटीको टीमलाई ४–१ गोलअन्तरले पराजित गर्दै उपाधि दाबेदार बनेको हो ।

 वर्षाका कारण एक दिन स्थगित गरी शुक्रबार हिलाम्य मैदानमा खेलाइएको प्रतिष्पर्धामा जापानी टिम लोभलाग्दो प्रदर्शनीबीच पनि फाइनल यात्रा तय गर्न असफल बन्यो ।

उसका दर्जनौं प्रहारले लिगको पाँचौ स्थानमा रहेको विभागीय एपीएफको डिफेन्स चिर्न सकेन । उता, पेनाल्टी सुटआउट समेत उत्कृष्ट बचाउ गरेका एपीएफ किपर नगरकोटी 'म्यान अफ दी म्याच' घोषित भए । टाइब्रेकरमा पाहुना टोलीबाट नातसुकी ताकेदाको पहिलो प्रहार नगरकोटीले बचाएका थिए भने तेस्रो प्रहार गरेका आकिरा इमामुरोले पेनाल्टी प्रहार क्रसबारबाट बाहिरिन पुगेको थियो ।

निर्धारित ९० मिनेटको खेलमा गोलको जालो बुन्न नसकेपछि एपीएफको टाइब्रेकरमा पु¥याउने रणनीति अन्ततः सफल भयो । एपीएफबाट सुदीप सिंखाकार, आशीष लामा, राजीव लोप्चान र राजु नगरकोटीले पेनाल्टीमा गोल गरेका हुन् ।

जापानका क्याप्टेन ताकुया हितोमीको प्रहार गोलमा परिणत भएको थियो । जितपछि एपीएफ प्रशिक्षक राजेन्द्र तामाङले भने, 'विपक्षीले जहाँ जहाँ बल खेल्छ, हामी त्यही रोक्ने प्रयास ग¥यौं ।'  यस्तै, जापानीज टिमका कोच टुकुरियो ताकेसीले आफ्नो टिमको रिबाउण्ड बलमा आफूहरु कमजोर र विपक्षी वीन हुँदा स्कोर हुन नसकेको बताए ।

नेपालमा दुई विभागीय टीम नेपाल पुलिस र एपीएफसँग खेल खेलेको उसले नेपालकी फुटबल कौशल राम्रो रहेको बताए । एपीएफले अब फाइनलमा लिग च्याम्पियन सिग्नेचर मनाङ मस्र्याङ्दी फुटबल क्लब र पाहुना टोली क्यामरुनको डफिन्स टिम फेमेली फुटबल क्लबबीचको विजेतासँग फाइनल खेल्नेछ । शनिबार मनाङ र क्यामरुनी टीम प्रतिष्पर्धामा उत्रिने आयोजक कास्की जिल्ला फुटबल संघले जनाएको छ ।