शान्ति र सुरक्षा : चनाखोपनको अपेक्षा

सुरम्य, शान्त र सुरक्षित भनेर चिनिएको प्रशान्त महासागरको दक्षिण-पश्चिममा अवस्थित् मुलुक न्यूजिल्याण्डलाई नेपालमा पर्वतारोही एडमण्ड हिलारीको देश भनेर पनि चिनिन्छ । स्मरणीय छ, तेञ्जिङ नोर्गे शेर्पा र हिलारी २०१० साल (सन्१९५३) मा एकसाथ विश्वको सर्वोच्च शिखर सगरमाथाको चुचुरो पुगेका थिए ।

करिव ४८ लाखको जनसंख्या भएको यो न्यूजिल्याण्ड अहिले एक दु:खद घटनाको सन्दर्भमा चर्चामा परेको छ । त्यहाँको ‘क्राइष्टचर्च’ शहरमा शुक्रवार एक आतङ्ककारी आक्रमण भयो जसमा ४९ जना निर्दोष मानिस मारिए । महिला, केटाकेटी कोही अपवाद भएनन् । साप्ताहिक प्रार्थनाको लागि मस्जिदमा भेला भएका नर-नारीउपर अन्धाधुन्ध गोली चलाइएको प्रेस विवरण आएका छन् । छिमेकी देश अष्ट्रेलियामा जन्मेको २८-वर्षे ब्य्राण्टन ट्यारेन्ट नामक बन्दूकधारीलाई प्रहरी नियन्त्रणमा लिइसकिएको छ । उसका मतियार र उग्रवादी विचारका अन्य प्रचारकहरूबारे पनि प्रहरी सजग भएको छ ।


Advertisement

अभियुक्त ट्यारेन्टले गोलीकाण्ड गर्नुभन्दा केही मिनेटअघि सामाजिक सञ्जालमा प्रकाशित गरेको ‘घोषणापत्र’ (मेनिफेस्टो) पढ्दा निजले आफू ‘गोरो’ भएकोमा अहङ्कार प्रकट गरेको प्रष्टै देखिन्छ । उसमा मुस्लिम समुदायप्रति चर्को घृणाभाव पनि रहेछ ; प्रतिशोधको भावना समेत तीव्र देखिन्छ । न्यूजिल्याण्ड र अष्ट्रेलिया दुबै देशका प्रधानमन्त्रीबाट यस क्रुर र अमानवीय आक्रमणको तत्कालै निन्दा भएको छ भने अमेरिका लगायतका धेरैवटा देशले यस्ता हिंसात्मक प्रवृत्तिको भर्त्सना गरेका छन् । नेपाल सरकारले पनि शुक्रवारको विभत्स घटनाबारे समयोचित प्रतिकृया दिएको छ ।

धर्मको आड र जातीय अहङ्कार प्रदर्शन गरिँदै गरिने हिंसात्मक कृयाकलाप सर्वथा निन्दनीय छन् । नेपालको यो स्थापित मान्यता हो । संसारको जेठो धर्मग्रन्थ वेद अनि शान्तिका अग्रदूत बुध्दको भूमि नेपालको सहिष्णुता र सहजीवनको परम्परा अनुकरणीय स्तरको रहिआएको छ । हो, विगत केही वर्षयता सह-अस्तित्वको यस वातावरणलाई धमिल्याउन, बिथोल्न दुष्प्रयास भएका छन् तर आशा गरौं यस्ता पापकर्म क्षणिक र प्रभावहीन भएर जानेछन् । बरु सरकार र समाजको चनाखोपन र पहरेदारी भने निरन्तर आवश्यक पर्छ ।     


Advertisement

कमेन्ट गर्नुहोस्