काठमाडौं- सत्तारुढ नेपाल कम्युनिस्ट पार्टी (नेकपा)का अध्यक्ष पुष्पकमल दाहाल 'प्रचण्ड'ले रेल ल्याउने सपना सबैले देख्नुपर्ने र त्यसलाई साकार गर्न पनि थाल्नुपर्ने बताएका छन् ।

सरकारले संसदमा प्रस्तुत गरेको नीति तथा कार्यक्रममाथिको छलफलमा मंगलवार भाग लिँदै प्रचण्डले सरकारको नीति तथा कार्यक्रम अभूतपूर्व रहेको भन्दै जोडदार समर्थन गरेका हुन् । उनले सामान्य सुधारको कुरा गरेर मात्र देशले विकासमा छलाङ मार्न नसक्ने बताए ।

यसअघि राष्ट्रपतिले प्रस्तुत गरेको सरकारको नीति तथा कार्यक्रममा 'मेरो सरकार' राखिएकोप्रति प्रचण्डले असन्तुष्टि जनाएका थिए । शनिवार नेकपाको संसदीय दलमा बोल्दै प्रचण्डले भनेका थिए, 'मैले हेर्दा त थिएन, पछि कहाँबाट आएछ ?' आफूलाई पढ्न दिइएको प्रतिमा 'मेरो सरकार' भन्ने शब्दावली नभएको प्रचण्डको दाबी थियो ।

शब्दावलीमा असन्तुष्टि जनाएका प्रचण्डले संसदमा सरकारको नीति तथा कार्यक्रमको एक कदम अघि बढेर समर्थन गरे । प्रधानमन्त्री केपी शर्मा ओलीले बेलाबेलामा भन्ने गरेको 'रेल र पानीजहाज'लाई प्रचण्डले आफ्नो समेत मुद्दा बनाए । सरकार 'उडन्ते' गफमा मात्र सिमित रहेको आलोचना भइरहेका बेलामा प्रचण्ड पनि आफू सरकारसँगै रहेको दाबी गरेका छन् ।

'तथाकथित सम्भव कुरा मात्र गर्ने भन्ने नाममा, सुधारात्मक कुरा मात्र गर्‍यौं भने नेपाल समृद्ध बन्दैन,' प्रचण्डले भने, 'हामीले ठूला आकांक्षाहरू राख्नुपर्छ र त्यसलाई पूरा गर्न त्यसका लागि राजनीतिक शक्ति परिचालन गरेर अगाडि बढ्नुपर्छ ।' 

नेपालमा विकास हुने कुरा असम्भव जस्तै सोच्ने गरेको इतिहास नेपालीको रहेको बताउँदै प्रचण्डले अब सबैले सपना देख्नुपर्ने बताए । 'यस्तो पनि होला र भनेर सोच्ने हाम्रो विगत छ, अहिले यथार्थ बन्दै छ,' प्रचण्डले भने, 'रेल आउला त ? अन्तर्राष्ट्रिय विमानस्थल बन्ला त ? भन्ने कताकता काल्पनिक कुरा, असम्भव कुरा, जनतालाई सपना मात्र देखाएको हो कि भन्ने लाग्ला ? यस्तै सपना देख्न पनि थाल्नुपर्छ र त्यसको साकार पार्नुपर्छ भन्ने म ठान्दछु ।'

सम्बोधनका क्रममा 'प्रचण्ड'ले एक वर्षमा गरेको कामका लागि सरकारलाई धन्यवाद दिनुपर्ने पटक पटक दोहोर्याए । 'समृद्ध नेपाल र सुखी नेपाली' राष्ट्रिय आकांक्षालाई सम्बोधन गर्न सरकारले गरेको प्रयासलाई सबैले धन्यवाद दिनुपर्ने प्रचण्डले बताएका हुन् ।  

'आफ्नै पार्टीकै नेतृत्वको सरकार भएकाले मैले भन्नु औपचारिक जस्तै देखिन्छ,' प्रचण्डले भने, 'त्यही पनि यो एक वर्षमा उसले समृद्ध नेपाल र सुखी नेपालीको आकांक्षा सम्बोधन गर्नका लागि गरेको प्रयासका निम्ति म धन्यवाद भन्न चाहन्छु ।' 

सरकारले मौलिक हकसँग सम्बन्धित कानूनहरूको निर्माण गरेर धेरै संवैधानिक विवाद हल गरेको प्रचण्डको भनाइ थियो । यसका लागि उनले प्रतिपक्षले पनि सरकारलाई धन्यवाद दिनुपर्ने बताए । 

'वैदेशिक सम्बन्धहरूलाई कसरी सन्तुलित बनाउने भन्ने समस्या थियो, बीचमा संविधान निर्माणको प्रक्रियामा देखा परेका तिता मिठा अनुभवहरूबाट सिक्यौं,' यो सरकारले छिमेकीसँगको सम्बन्धलाई नयाँ उचाईमा पुर्‍याएको बताउँदै प्रचण्डले भने, 'नयाँ सरकार बनिसकेपछि छिमेकीसँगको सम्बन्धलाई सन्तुलित र राष्ट्रिय हित अनुकूल अघि बढाउने प्रयास भएको छ, यसले समृद्धिको ऐतिहासिक आधार तयार भएको छ ।'