‘प्रधानमन्त्रीज्यू ! धूलो र मास्क हेर्न सडकमा आउनुस्, सिंहदरबारबाट देखिँदैन’ [भिडियोसहित]

गगन अर्याल
गगन अर्याल

लोकान्तर संवाददाता अर्याल सुरक्षा/अपराध तथा समसामयिक विषयमा समेत कलम चलाउँछन् ।

काठमाडौं – प्रधानमन्त्री केपी शर्मा ओलीले सरकारको नीति तथा कार्यक्रममा उठेका प्रश्नको जवाफ दिँदै सडकमा धुलो हटेको दाबी गर्दै भने, ‘मान्यज्यूहरूले पोहोरसाल मास्क लगाएर हिँड्नुहुन्थ्यो, अहिले नलगाइ हिँड्नुहुन्छ ।’

संसद भवनभित्र सांसदले मास्क नलगाएको भन्दै प्रधानमन्त्री ओलीले काठमाडौंमै धूलो कम भएको दाबी गरे । तर धूलाम्मे बाटोमा मास्क नलगाएर हिँड्ने कमै देखिन्छन् ।


Advertisement

प्रधानमन्त्री ओलीको भनाइबारे सर्वसाधारणबाट प्रतिक्रिया माग्दा आक्रोश देखिन्छ । काठमाडौंका प्रायःजसो सडक धुलाम्मे नै छन् ।


Advertisement

‘प्रधानमन्त्री ज्यू ! एकचोटी सडकमा आएर हेर्नुहोस् अवस्था कस्तो छ ? तपाई सिंहदरबारमा बसेर बोले जस्तो छैन, हामी यहाँ हरेक मिनेटमा मास्क लगाएर बस्नुपर्छ,’ चाबहिलमा मोटरसाइकलको शोरुम चलाउँदै आएका नयाँ बस्तीका दिनेश नेपालले आक्रोश पोखे, ‘सिंहदरबारमा बस्ने नेतालाई धूलोले असर गर्दैन तर सडकमा हिँड्ने जनतालाई मास्क नलगाई आवतजावत गर्न गाह्रो अवस्था छ ।’

काठमाडौंको चाबहिल चोकदेखि गौशाला चोकसम्म यातायातका साधन आवतजावत गर्दा मेलम्ची खानेपानी आयोजनाले खनेको बाटोको धूलोले स्थानीय सर्वसाधारण आजित छन् । चिल्ला गाडी चढेर हिँड्ने र आफू हिँड्ने क्षेत्रको मात्रै बाटो बनाउने प्रधानमन्त्री तथा नेतालाई प्रश्न तेस्र्याउँदै लोकन्थलीका विनोद पौडेल भन्छन्, ‘उहाँहरू त चिल्लो गाडीमा हिँड्नुहुन्छ, के थाहा सडकमा कति धुलो छ भनेर ?’

उनले दिनहुँ हिँड्ने बाटो १०/११ महिना हुँदासम्म पनि बाटो जस्ताको तस्तै भएको खिन्न भएको भाव व्यक्त गरे । ‘प्रधानमन्त्री ओलीले समृद्धिको कुरा गरिरहँदा काठमाडौं उपत्यकाका सडकले नै कति समृद्धि आउँदैछ भन्ने कुराको पुष्टि गरेको छ,’ उनले भने । काठमाडौं चाबहिल, बौद्ध, गोंगबु, नयाँ बसपार्क, बालाजु, कालिमाटीलगायत उपत्यकाका मुख्य क्षेत्रमा नै धूलोको बढी समस्या छ ।

 

कामको सिलसिलामा काठमाडौंमा १० दिनअघि आएकी गायत्री उप्रेतीलाई उपत्यका छिट्टै छोड्ने मन छ । बालाजु क्षेत्रमा दिनदिनै हिँड्दा धुलोले रुघाखोकी लागेको उनले बताइन् । ‘सरकारले समृद्धि–समृद्धि भनिरहेको छ । राजधानीको अवस्था त यस्तो छ भने अरु ठाउँको कुरै छोड्नुस्,’ उनले भनिन् ।

काठमाडौंलाई सफा शहरको रुपमा विकास गर्न उपत्यकाका विभिन्न नाकामा गाडी सफागर्ने मेसिन राखिने सरकारको नीति तथा कार्यक्रममा उल्लेख गरिएको छ । केही महिनाअगाडि काठमाडौंलाई सफा शहर बनाउँ भन्ने कार्यक्रमको उद्घाटन गर्दै भौतिक पूर्वाधार तथा यातायात मन्त्री रघुवीर महासेठले पनि मेसिनहरू राखेर काठमाडौंमा धुलोको स्रोतलाई भित्रिन नदिने बताएका थिए ।

काठमाडौं महानगरपालिकाले ११ करोड रुपैयाँ खर्च गरेर ५ वटा ब्रूमर राति ८ घण्टा सञ्चालन गर्दै आएको छ । तर धूलोको समस्या हटेको छैन । महानगरपालिकाले समेत काठमाडौंको धूलो छिट्टै हट्ने जिकिर गरेको छ ।

समय–समयमा काठमाडौं उपत्यकालाई धूलो तथा प्रदूषण नियन्त्रण गर्न भनेर सार्वजनिक यातायातको अवस्थालाई परीक्षण गर्दै वन तथा वातावरणमन्त्री शक्तिबहादुर बस्नेतले उपत्यकालाई प्रदूषणमुक्त बनाउने जिकिर गर्दै आएका छन् । तर उपत्यकाको वातावरणको अवस्थामा कुनै परिवर्तन आएको देखिँदैन ।

 

कमेन्ट गर्नुहोस्