जनकपुरधाम- प्रदेश नम्बर दुईमा विभिन्न किसिमको सेवा सुविधा लिँदै आएका सांसदहरूको लागि प्रदेशसभाले थप सुविधा उपलब्ध गराएको छ ।

आफ्नै सवारी साधन नभएका सांसदलाई प्रदेश नम्बर २ को प्रदेशसभामा ल्याउन र घरसम्म पुर्‍याउन हायसको सुविधा प्रदेशसभा सचिवालयले उपलब्ध गराएको छ । जुन-जुन दिन प्रदेशसभाको बैठक सञ्चालन हुन्छ त्यस-त्यस दिन प्रदेशसभाको हायस सडकमा गुड्ने गरेको छ । 

प्रदेशसभा सचिवालयका सचिव रंजित कुमार यादवका अनुसार प्रदेशसभाको बैठक बस्नुभन्दा १ घण्टा पहिले निर्धारण गरिएको रूटमा हायस जाने गरेको छ र प्रदेशसभाको बैठक सम्पन्न भएपछि सांसदहरूलाई घरसम्म पुर्‍याउने पनि गरिएको छ । ज १ ग ३२३ र ज १ ग ३२४ नम्बरको दुई वटा हायस प्रदेशसभाले किनेर सांसदहरूलाई उक्त सुविधा उपलब्ध गराएको छ । ६९ लाख रुपैयाँमा एउटा हायस किनिएको उनले बताए । 

‘खास गरेर प्रदेशसभाको बैठक बसेको दिन सांसदहरूलाई आउन त समस्या हुने गरेको थिएन,’ सचिव यादवले भने,’ ट्याक्सी  भाडा गरेर आउनुहुन्थ्यो तर बैठक सम्पन्न भएपछि घर फर्किनका लागि ट्याक्सी नपाउँदा समस्या हुने गरेको थियो ।’ प्रदेशसभा सचिवालयमा कतिपय सांसदहरूले उक्त समस्याबारे अनौपचारिक रूपमा समेत गुनासो व्यक्त गरेका कारण सचिवालयले हायस किन्ने विकल्पमा निर्णय लिएको उनले बताए ।

अहिले प्रदेशको अस्थायी राजधानी जनकपुरधाममा दुवै हायसको लागि रूटसमेत निर्धारण गरिसकिएको छ । ज १ ग ३२३ नम्बरको सेतो प्लेटको हायसका लागि जनकपुरको मुजेलियादेखि जिरोमाइल हुँदै मुरलीचोकदेखि प्रदेशसभा सम्मको रुट निर्धारण गरिएको छ । उक्त रुटमा उक्त हायस वैशाख ३१ गते देखि सञ्चालनमा ल्याइएको छ ।

त्यसै गरी ज १ ग ३२४ नम्बरको सेतो प्लेटको अर्को हाईसको लागि पनि रुट निर्धारण गरिएको छ । प्रदेश सरकारको प्रशानिक कार्यालय मधेश भवनदेखि मिल्स एरिया, भानु चोक, कदम चोक, मुरली चोक हुँदै प्रदेशसभा भवनसम्म रूट निर्धारण गरिएको प्रदेशसभा सचिवालयका सचिव यादवले बताए । तर अहिले उक्त रूटमा भने हायस सञ्चालनमा आएको छैन ।

प्रदेशसभाले आफ्नै हायस किनेपछि सांसदहरूलाई प्रदेशसभा भवनमा ओसारपसार गर्नुका साथै अन्यत्र सांसदहरूलाई लिएर भ्रमण, अनुगमन आदि काममा पनि प्रयोगमा ल्याउन सकिने उनले बताए ।

प्रदेश सरकारका पदाधिकारीदेखि प्रदेशसभाका पदाधिकारीहरूसँगै अन्य कतिपय संसदीय समितिका सभापतिहरूको लागि प्रदेशसभा सचिवालयले सवारीसाधनको सुविधा उपलब्ध गराएको भए पनि सवारीसाधन नभएका सांसदहरूको लागि हायस किनिएको उनले बताए ।