काठमाडौं– भूकम्पपछिको पुनर्निर्माणका लागि भारतले नेपाललाई डेढ अर्ब रुपैयाँ उपलब्ध गराएको छ ।

सोमवार काठमाडौंमा अर्थमन्त्री युवराज खतिवडालाई उक्त रकम हस्तान्तरण गरिएको हो । नेपालका लागि भारतीय राजदुत मन्जीव सिंह पुरीले अर्थमन्त्री खतिवडालाई १ अर्ब ६० करोड रुपैयाँको चेक हस्तान्तरण गरेका हुन् ।

भारत सरकारले आवास पुनर्निमाणका लागि नुवाकोट र गोरखा जिल्लाका ५० हजार लाभग्राहीहरूलाई प्रदान गरेको पहिलो तथा दोस्रो किस्ताको शोधभर्नाका लागि उक्त रकम उपलब्ध गराएको हो । 

पुनर्निर्माणका लागि नेपाललाई भारतले हालसम्म कुल ४ अर्ब ५० करोड रुपैयाँ उपलब्ध गराइसकेको भारतीय दुतावासद्वारा जारी विज्ञप्तिमा उल्लेख गरिएको छ ।

चेक हस्तान्तरणका लागि आयोजित कार्यक्रममा अर्थमन्त्री खतिवडाले भूकम्प पश्चातको पुनर्निर्माणमा भारत सरकारले गरेको सहयोगप्रति आभार प्रकट गरे । त्यस्तै भारतीय राजदूत पुरीले नेपालमा भूकम्प पश्चातको पुनर्निर्माणका लागि भारत सरकार प्रतिबद्ध रहेको बताए । 

उक्त कार्यक्रममा अर्थ सचिव राजन खनालको पनि सहभागिता रहेको थियो ।