काठमाडौँ - नेपाल पत्रकार महासंघ १ नम्बर प्रदेश समितिले इटहरीमा पत्रकारमाथि भएको दुर्व्यवहारको अध्ययन गर्न गठन गरेको मिसन टोलीले पत्रकारले मेयरलाई धम्की दिएर उत्तेजित बनाएको निष्कर्ष निकालेको छ । पत्रकारमाथि दुर्व्यवहार भएको भन्दै छानबिनका लागि उक्त मिसन टोली गठन गरिएको थियो ।

'पत्रकार विराट अनुपमले फेसबुकमा लेखेको स्ट्याटसमा मेयर द्वारिकलाल चौधरीले कमेन्ट गरेको विषयलाई फोन गरेर उत्तेजित बनाएको पाइयो,' टोलीले सार्वजनिक गरेको प्रतिवेदनमा उल्लेख गरिएको छ, 'साथै पत्रकार विराट अनुपमले पटक-पटक सामाजिक संजाल फेसबुकमा दिने गरेको निजी अभिव्यक्ति तथा धारणाले थुप्रै पत्रकार र सामाजिक व्याक्तिको मानमर्दन र प्रतिष्ठामा आघात पुगेको गुनासा थुप्रै पाइयो ।'

पत्रकार मोहनकाजी न्यौपानेको संयोजकत्वमा गणेश लम्साल, अमर खड्का र जयकृष्ण यादव सदस्य रहेको मिसन टोलीले अध्ययनपछि यथार्थ बाहिर ल्याउन जिम्मेवारी दिइएको मिसन टोलीले मेयर द्वारिकलाल चौधरीसँग भेटेर यसबारेमा छलफल गरेको थियो ।  भेटमा चौधरीले आफूले गल्ती गरेको पाइए सय पटक उठबस गर्न पनि तयार रहेको अभिव्यक्ति दिएका थिए ।

मिसन टोलीले पत्रकारले भ्रष्टाचार विरोधी अभियानलाई असफल पारेको मेयर चौधरीको आरोपलाई पनि तथ्यहीन बताएको छ । मेयर चौधरीले आफूले पत्रकार र प्रेस जगतप्रति गलत अभिव्यक्ति दिएको स्वीकार गरेको टोलीले आफ्नो प्रतिवेदनमा उल्लेख गरेको छ ।