काठमाडौं- सरकारले सार्वजनिक सवारी साधनको भाडा वृद्धि गरेको छ । 

यातायात व्यवस्था विभागका अनुसार सार्वजनिक सवारी साधनमा लाग्ने भाडा १२ प्रतिशत बढाइएको हो । यातायात व्यवस्था विभागका महानिर्देशक कुमार प्रसाद दाहालले आगामी असार देखि लागू हुने गरी सार्वजनिक यायतातको भाडा वृद्धि गरिएको जानकारी दिए ।

२०७५ असोज ७ गते भाडादर समायोजन गर्ने समिति गरिएको सोही समितिले सिफारिस गरेको आधारमा भाडा दर कायम गरिएको दाहालले लोकान्तरलाई बताए ।  गत असोजमा समितिले तत्कालीन रूपमा १० प्रतिशतसम्म भाडादर वृद्धि गरेपनि उक्त भाडा दर वैज्ञानिक नरहेको भन्दै आज वैज्ञानिक भाडादर कायम गरिएको दाहालले बताए ।  

‘असोजमा समिति गठन भएपछि त्यसको एक महिनाभित्र वैज्ञानिक भाडादर कायम गर्ने म्यान्डेट दिइएको रहेछ’ दाहालले लोकान्तरसँग भने, ‘एक महिनापछि भाडा दर वृद्धि गरिएन । अहिले करीब एक वर्ष नै हुन लागेको अवस्थामा सबै कम्पोनेन्टको अध्ययन गरी भाडा समायोजन गरेका हौं ।’

सवारी चालक तथा सहचालकको ज्याला, सवारी साधनमा प्रयोग हुने इन्धन र मेकानिल वस्तुको आधारमा देशैभरि लागू हुने गरी भाडा दर समायोजन गरिएको दहालले बताए । देशैभरि सबै किसिमका सार्वजनिक सवारीमा भाडादर लागू हुने र ट्याक्सीमा समेत भाडा समायोजन गरिएको विभागको भनाइ छ ।

केही समय अघिदेखि यायायात व्यवसायीले सवारी साधनमा लागू हुने भाडा वृद्धि गर्नुपर्ने माग राख्दै आएका थिए ।  दशैंअघि सरकारले १० प्रतिशत गाडी भाडा बढाएको थियो ।

सार्वजनिक यातायातको भाडा वृद्धिका सम्बन्धमा उपभोक्ता अधिकारकर्मीहरूले आपत्ति जनाएका छन् । उपभोक्ता अधिकार अनुसन्धान मञ्चका अध्यक्ष माधव तिमिल्सिनाले  सार्वजनिक यातायातमा यात्रुले सास्ती खेप्नु परेको बेला यातायात व्यवस्था विभागले भाडा बढाउनु उपयुक्त नभएको बताए । सार्वजनिक यातायातलाई व्यवस्थित र मर्यादित बनाउनुका साटो उल्टै हचुवाको भरमा भाडा बढाउनुले यात्रुवर्गलाई थप असहज थोपरेको तिमिल्सिनाको भनाइ थियो ।