सुर्खेत- एम्बुलेन्सको काम के हो ? सबैलाई थाहा छ । तर मुगु जिल्लाको छाँयानाथ रारा नगरपालिकाको एम्बुलेन्सको काम सुर्खेतबाट मदिरा ढुवानी गर्ने कार्यमा परिचालित भएको पाइएको छ ।

शुक्रवार वीरेन्द्रनगरको हटियालाईनमा उक्त एम्बुलेन्स भित्र कमसल खालको मदिरा ‘लिच्ची’ लोड हुँदै गरेको अवस्थामा फेला परेपछि एम्बुलेन्सले मदिरा बोक्ने रहस्योदघाटन भएको हो ।

प्रत्यक्षदर्शी खड्कबहादुर विसीका अनुसार एम्बुलेन्समा मदिरा, लिच्चि जुस र रेडबुल भरेको आफुले देखेको बताए । छाँयानाथ नगरपालिकाले यसअघि नै मदिरा निषेधित क्षेत्र घोषणा गरिसकेको छ ।

नगरपालिकालाई मदिरा निषेध गरिएको मंसिर १ गतेदेखि हो । मदिरा निषेध भएपछि ‘व्यवसायीले निर्वाध रूपमा मदिरा भित्र्यौना नसकेपछि एम्बुलेन्सको प्रयोग भएको हो,' स्थानीय गोविन्द खत्री भन्छन्, ‘यसरी एम्बुलेन्सको दुरुपयोग गर्नेलाई राज्यले कारवाही गर्नुपर्छ ।’

उसो त एम्बुलेन्सको काम बिरामी बोक्ने हो । तर एम्बुलेन्समा जुस, मदिरा लिन भने पाईदैन । नगरउपप्रमुख सुन्तला रोकाय भने आफुलाई यसबारेमा केहि थाहा नभएको बताउँछिन् । ‘मेयरलाई नै सोध्नुस । उहाँ नै हर्ताकर्ता हो,'  उनले भनिन्, ‘त्यसरी मदिरा त नल्याउनु पर्ने हो ।’

नगरप्रमुख हरिजंग शाही भने एम्बुलेन्सले मदिरा ढुवानी गर्दै नगरेको दाबी गर्छन् । शुरूमा आफ्नो एम्बुलेन्स नभएको उनको दाबी थियो । ‘हामीले धेरै पहिले नै मदिरा निषेध गरिसकेका छौं,’ उनले भने, ‘त्यस्तो हुनै सक्दैन ।’ यदि त्यस्तो भएको साँचो हो भने चालक तथा अन्यलाई कारवाही गर्न आफु तयार रहेको बताए । उनले सर्भिसिङ गर्न एम्बुलेन्सलाई नेपालगञ्ज पठाइएको दाबी गरेका छन् । तर नगरप्रमुख शाही भने जुस मात्रै बोकेको दाबी गरेका छन् ।