काठमाडौं – क्रिकेट विश्वकपमा आइतवार सम्पन्न फाइनल जस्तो खेल बिरलै मात्र देख्न पाइन्छ । 

बेन स्टोक्स र इंग्ल्यान्डका लागि हिजो निकै भाग्यशाली दिन थियो । इंग्ल्यान्डले अन्तिम ओभरमा चार अतिरिक्त रन पाएर खेलमा फर्किन सफल भएको थियो । 

तिनै चार रनले आइतवार लर्ड्सको ऐतिहासिक मैदानमा न्युजील्यान्डलाई विश्वविजेता बन्न दिएनन् ।

इंग्ल्यान्डलाई अन्तिम ओभरमा जीतका लागि १५ रन आवश्यक थियो । ओभरको तेस्रो बलमा छक्का हानेर स्टोक्सले तीन बलमा नौ रनको स्कोर बनाए । चौथो बलमा स्टोक्सले मिडविकेट बाउन्ड्रीमा प्रहार गरे र दुई रन लिन दौडिए ।

क्रीजमा पुग्नलाई उनले ब्याट घिसारे । त्यतिखेरै मार्टिन गप्टिलको थ्रो उनको ब्याटसँग ठोकियो र बल बाउन्ड्री लाइन पारि पुग्यो । स्टोक्स र इंग्ल्यान्डले यसरी एक बलमा ६ रन पाए । अब दुई बलमा तीन रन बनाए पुग्ने भयो । 
इंग्ल्यान्डले पाएको यो रन नियमअनुसार सही थियो । 

न्युजील्यान्डका कप्तान केन विलियमसनले यसमा दुःख प्रकट गरे । उनले म्याचपछि भने, ‘स्टोक्सको ब्याटमा गएर बल ठोकिनु लज्जाको कुरा हो । यसले नै खेलको दिशा परिवर्तन गरिदियो । यति महत्त्वपूर्ण क्षणमा यस्तो कहिल्यै नहोस् भनी म कामना गर्छु ।’

विलियमसनलाई उनको उत्कृष्ट प्रदर्शनका लागि प्लेयर अफ द टूर्नामेन्ट दिइयो । 

न्युजील्यान्डको क्राइस्टचर्चमा जन्मिएका स्टोक्सले खेलपछि न्युजील्यान्ड टीमसँग माफी मागे । उनले भने, ‘अन्तिम ओभरमा बल मेरो ब्याटमा ठोकिएर सीमारेखापारि पुग्यो । यस्तो मैले सोचेकै थिइनँ । मैले केनसँग यसबारेमा धेरैचोटि माफी मागिसकेको छु । म यस्तो गर्न चाहँदिनथिएँ ।’

एजेन्सी