काठमाडौं –राजधानीकोबल्खुस्थित तरकारी बजारभित्रै बिचौलियाको बिगबिगी रहेका पाइएको छ ।

वाणिज्य, आपूर्ति तथा उपभोक्ता हित संरक्षण विभागले गरेको अनुमगनका क्रममा बल्खु तरकारी बजारमै बिचौलियाहरूको बिगबिगी रहेको पाइएको हो ।

बल्खु तरकारी बजारकै एक पसलबाट तरकारी किनेर अर्को पसमा बिक्री गर्ने र त्यसमा पनि अत्यधिक नाफा लिने गरेको अनुमगनका क्रममा पाइएको छ ।

बल्खु तरकारी बजारका व्यवसायी गोविन्दमान श्रेष्ठ बजारभित्रै अर्को पसलबाट तरकारी खरिद गरी ३३ प्रतिशत भन्दा बढी नाफा राखेर बिक्री गरिरहेको अवस्थामा फेला परे ।

उनले बल्खु तरकारी बजारकै एक पसलबाट तरकारी खरिद गरेर अत्यधिक नाफा लिई बिक्री गर्दै आइरहेका थिए ।

शुक्रवार विभागले गरेको अनुगमनका क्रममा उनले प्रतिकिलो ८० रुपैयाँका दरले खरिद गरेको चिप्ले भिण्डी १ सय २० रुपैयाँका दरले बेचिरहेको पाइयो ।

उनले बजारभित्रै किनेको तरकारी कम्तिमा ३३ प्रतिशत नाफा राखेर बेचिरहेका थिए ।

बाहिरैबाट खरिद गरेर ल्याउने हो भनेपनि २० प्रतिशत भन्दा बढी नाफा लिन नपाइने विभागका अधिकारीहरू बताउँछन् ।

अधिकारी सप्लायर्स नामक पसल सञ्चालन गरी बल्खुको तरकारी बजारभित्रै व्यापार गर्दै आएका उनले अनुगमन अधिकारीहरूले आवश्यक कागजात माग गर्दा समेत देखाउन सकेका थिएनन् ।

बल्खुभित्रै बिचौलियको काम गरेको र व्यवसाय दर्ता लगायतका आवश्यक प्रमाण पत्र देखाउन नसकेपछि श्रेष्ठलाई २० हजार रुपैयाँ जरिवाना गरिएको अनुगमन अधिकारी पवनकुमार प्याकुरेलले जानकारी दिए ।

श्रेष्ठले उपभोक्ता संरक्षण ऐन २०७५ को खण्ड (घ) बमोजिम कसूर गरेको देखिएकाले उनलाई सोही ऐनको दफा ३९ अनुसार जरिबाना गरिएको प्याकुरेलले लोकान्तरलाई जानकारी दिए ।

उनलाई व्यवसाय दर्ताको सक्कली प्रमाण पत्र लिएर एक हप्ताभित्र विभागमा उपस्थित हुन निर्देशन समेत दिइएको छ ।

१९ व्यवसायीलाई जरिवाना

विभागले कालीमटी फलफूल तथा तरकारी बजार र बल्खु तरकारी बजारका गरी १९ व्यवसायीलाई जरिवाना गरेको छ ।

तरकारी खरिद–बिक्रीको बिलबिजक नराखेको र जथाभावी तरकारीको कारोवार गरेको भन्दै व्यवसायीहरूलाई कारवाही गरिएको विभागले जानकारी दिएको छ ।

उपभोक्ता संरक्षण ऐन, २०७५ अनुसार कारोवारको बिलबिजक राख्नुपर्ने भएपनि तरकारी व्यवसायीले नराख्ने गरेको पाइएपछि सोही ऐन अनुसार कारवाही गरिएको विभागको भनाइ छ ।

त्यसरी जरिवाना गरिएका मध्ये बल्खुका ११ र कालीमाटीका ८ व्यवसायी छन् ।

विभागले बल्खुमा १० व्यवसायीलाई पाँच/ पाँच हजार रुपैयाँका दरले र एक व्यवसायीलाई २० हजार रुपैयाँ जरिवाना गरेको छ ।

विभागका अनुसार कालिमाटी तरकारी बजारमा २ व्यवसायीलाई १०/१० हजार रुपैयाँका दरले र ६ व्यवसायीलाई ५/५ हजार रुपैयाँका दरले जरिवाना गरिएको छ ।