काठमाडौँ - ललितपुर महानगरपालिकाले दुई वटा ब्रुमर र दुईवटै पानी ट्यांकर शुक्रवार (आज)बाट सञ्चालनमा ल्याएको छ ।

महानगरले हिलो र धुलो मुक्त महानगर बनाउने अभियानमा दुई इटालीयन ब्रुमर र २ पानी टयांकर सञ्चालनमा ल्याएको हो ।

टेण्डर प्रक्रियाद्वारा महानगरले खरिद गरेको ब्रुमर र पानी ट्यांकर यही साउन १० गते महानगरपालिकामा ल्याइएको थियो । इटालियन कम्पनीको म्याक्रोको एम–६० मोडलको ब्रुमर ४ करोड ४८ लाखमा दुईवटा खरिद गरिएको हो ।

यसको इन्जीनको क्षमता भने १ सय १० किलोवाटको छ । यसको हुपरको क्षमता ६० मिटरको छ । यसले स–साना धुलोहरु संकलन गर्ने महानगरका वरिष्ठ अधिकृत सागर थापाले बताए ।

ब्रुमरबाट कुपन्डोलदेखि पुलचोक, जावलाखेल हुँदै लगनखेलसम्म सरसफाई गर्ने महानगरले जनाएको छ । आवश्यक परेमा महानगरको भित्री बाटोमा पनि सरसफाइ गरिने महानगरले जनाएको छ । डिजेलबाट चल्ने ब्रुमरको ६ सय २० लिटर पानी र ६ घनमिटर धुलो भण्डारण गर्ने क्षमता रहेको छ ।

ब्रुमरको अगाडि, दायाँबाँया र बीचमा गरेर ४ वटा ब्रस तथा पछाडि एउटा भ्याकुम रहेको छ । ब्रुमर सञ्चालनका लागि महानगरका ५ जना प्राविधिकहरुलाई सात दिनको तालिम समेत दिइएको छ ।

२ पानी ट्रयांकर भने महानगरले ६२ लाख ९० हजारमा भ्याट रकमसहित किनेको हो । भारतमा बनेको १०१० मोडेलको टाटाको एलपीटिको क्षमता ९३ दशमलव २ किलोवाट रहेको छ । उक्त पानी ट्यांकरले ६ हजार लिटर पानी भण्डारण गर्न सक्छ ।

हेर्नुहोस् भिडियो -