काठमाडौं – अमेरिकाका राष्ट्रपति डोनल्ड ट्रम्पले कश्मीरमा विस्फोटक परिस्थिति रहेको भन्दै यो जटिल ठाउँ भएको बयान मंगलवार दिएका छन् । 

भारतका प्रधानमन्त्री नरेन्द्र मोदी र पाकिस्तानका प्रधानमन्त्री इमरान खानसँग फोनमा कुरा गरेको भोलिपल्ट ट्रम्पले कश्मीरमा परिस्थिति शान्त बनाउनका लागि कोशिश गर्ने बताए । 

ट्रम्पले कश्मीरलाई धार्मिक दृष्टिकोणले हेर्दै भारत र पाकिस्तानबीचको तनावको प्रमुख कारण यही भएको बताए । 

ह्वाइट हाउसमा पत्रकारहरूसँग कुराकानी गर्दै ट्रम्पले भने, ‘भारत र पाकिस्तानबीच अनेकौं समस्या छन् र म मध्यस्थता वा अन्य तरिकाले यसको समाधानको कोशिश गर्नेछु । दुवै देशसँग अमेरिकाको राम्रो सम्बन्ध छ तर ती दुवै चाहिँ साथी हैनन् । परिस्थिति जटिल छ र यसमा धर्मको प्रमुख भूमिका छ । त्यहाँ धर्म एक जटिल विषय हो ।’

यसअघि ट्रम्पले मध्यस्थताको प्रस्ताव राख्दा भारतले कश्मीर द्विपक्षीय मुद्दा भएकाले तेस्रो पक्षको उपस्थिति अस्वीकार्य हुने बताएको थियो । अमेरिकी नेताहरूले नै कश्मीरमा मध्यस्थता गर्नु नहुने बताएका थिए । त्यतिखेर सामसुम भएको कुरा ट्रम्पले किन फेरि उठाएका हुन् ?

अफगान शान्तिवार्तामा पाकिस्तानको पनि महत्त्वपूर्ण भूमिकालाई मद्देनजर गर्दै ट्रम्पले पाकिस्तानलाई खुशी बनाउनका लागि शायद अनौपचारिक रूपमा कश्मीर मध्यस्थताको बयान दिइरहेका हुन् ।

भारत सरकारले धारा ३७० हटाएपछि अमेरिकाले बयान दिँदै कश्मीर मुद्दामा पुरानो दृष्टिकोण कायम रहेको बताएको थियो । अर्थात् कश्मीर मुद्दालाई द्विपक्षीय रूपमा नै सुल्झाउने दृष्टिकोण आफूले राखेको अमेरिकाको भनाइ थियो । 
न्युयोर्कमा संयुक्त राष्ट्रसंघ सुरक्षा परिषद्को बैठकअघि पनि ट्रम्पले पाकिस्तानका प्रधानमन्त्री इमरान खानलाई फोन गरेर भारतसँग द्विपक्षीय वार्ता गर्न जोड दिएका थिए । 

सोमवार मात्र ट्रम्पले मोदी र खानलाई फोनमा कुरा गर्दा कश्मीरमा मध्यस्थताको कुरा उठाएका थिएनन् । भोलिपल्ट अचानक उनले यो कुरा झिके । 

मोदीको कश्मीर नीतिबाट चिन्तित पाकिस्तानी प्रधानमन्त्री खानले बारम्बार अमेरिकालाई गुहार लगाइरहेका छन् । त्यसैले पनि ट्रम्पले उनको मन राख्न कश्मीरमा मध्यस्थताको प्रस्ताव राखिरहेको हुनुपर्छ ।

एजेन्सी