काठमाडाैं– प्रमुख सत्तारुढ दल नेपाल कम्युनिस्ट पार्टी (नेकपा) का अध्यक्ष पुष्पकमल दाहाल प्रचण्डले जनहितभन्दा व्यक्तिगत हितमा केन्द्रित भए सत्ता ढल्न सक्ने चिन्ता व्यक्त गरेका छन् ।

ललितपुरमा शुक्रवार आयोजित प्रोग्रेसिभ इन्जिनीयरिङ एसोसिएसन नेपालकाे प्रशिक्षण कार्यक्रमलाई सम्बोधन गर्दै अध्यक्ष प्रचण्डले जनचाहना अनुसार अघि बढ्नुपर्ने बताएका हुन् ।

'कम्युनिष्टहरू सत्तामा नपुग्दासम्म जनताको पक्षमा लाग्ने र सत्तामा पुगेपछि त्यसलाई बिर्संदै जाने प्रवृत्ति देखिएको छ,' अध्यक्ष प्रचण्डले भने, 'राष्ट्र र जनताको चाहाना के हो ? कार्यशैली के हुने हो भन्ने बिर्सेर विस्तारै–विस्तारै बुर्जुवा शैलीतर्फ जान थालेकोप्रति चिन्ता लागेको छ ।'

सोभियत संघ लगायतमा कम्युनिस्ट सत्ता ढल्नुको कारण कोट्याउँदै उनले बुर्जवाहरूले कम्युनिस्टहरूसँग लड्न नसक्ने तर सत्तामा गएपछि विकृत बनाउने र एउटा गोली पनि नचलाई उल्टाइदिने गरेकाे बताए ।

उनले थपे, ‘पूर्व युरोपमा विदेशी हस्तक्षेप भएर वा कसैले सशस्त्र संघर्ष गरेर सत्ता उल्टिएको होइन, कम्युनिस्ट नेताहरू नै राजा महाराजा जस्तै हुँदै गएपछि जनताले लखेटेका हुन् ।’

कम्युनिष्ट नेताहरूको अनुशासनको स्तर गिरेको उनको चिन्ता छ ।

'कम्युनिस्टहरूमा वैचारिक विचलन आएको छ । सामूहिकता भन्दा व्यक्तिगत निर्णयणतर्फ केन्द्रित भएको महसूस भएको छ । यसलाई परिवर्तन गर्नुपर्छ,’ उनले भने ।

साथै प्रचण्डले मार्क्सवादलाई अक्षरशः पालना गर्ने भन्दा पनि मार्गदर्शन सिध्दान्तका रूपमा लिनुपर्ने बताए ।

ललितपुरमा शुक्रबार आयोजित प्रोग्रेसिभ इन्जिनीयरिङ्ग एसोसिएसन नेपालकाे प्रशिक्षण कार्यक्रममा उनले यस्ताे बताएका हुन् ।

‘एउटा प्रवृत्ति मार्क्सवाद , लेनिनवाद या द्वन्द्वत्मक तथा ऐतिहासिक भौतिकवादलाई एउटा धर्मशास्त्रको रूपमा बुझ्ने र त्यसमा जे लेखेको छ अक्षरशः पालनाभन्दा पनि मार्गदर्शन बनाउनु पर्छ,’ प्रचण्डले भने ।

अध्यक्ष प्रचण्डले पार्टी एकतामा केही ढिला भएपनि लगभग सबै प्रक्रिया टुंगिएको जानकारी दिए ।