उत्तर कोरियाले शनिवार दुईवटा क्षेप्यास्त्र परीक्षण गर्‍यो

काठमाडौं – उत्तर कोरियाका नेता किम जोङ उनले शनिवार निकै विशाल क्षेप्यास्त्र प्रक्षेपकको परीक्षणलाई अवलोकन गरेको त्यहाँको सरकारी समाचार संस्था केसीएनएले जनाएको छ । 

त्यस प्रक्षेपकबाट दुईवटा छोटो दूरीका ब्यालिस्टिक क्षेप्यास्त्रहरू प्रहार गरी समुद्रमा खसाइएको दक्षिण कोरियाको सेनाले पनि पुष्टि गरेको छ । 


Advertisement

जुलाई महिनाको अन्तिमतिरबाट गरिएको यो सातौं चरणको प्रक्षेपण हो । गत साता मात्र किमले दुई बेग्लाबेग्लै क्षेप्यास्त्र प्रक्षेपण गरेका थिए । 

किम र अमेरिकाका राष्ट्रपति डोनल्ड ट्रम्पबीच फेब्रुअरी महिनामा आणविक निःशस्त्रीकरण वार्ता अवरुद्ध भएको थियो । 

उत्तर कोरियाले हतियार कार्यक्रममा उल्लेख्य उपलब्धि हासिल गरेको विज्ञहरूले दाबी गरेका छन् । यसले वाशिङटनको निद्रा खल्बल्याउने एमआईटीका राजनीतिशास्त्रका सहाप्राध्यापक विपिन नारंगले बताए । 

यी क्षेप्यास्त्रले क्षेत्रीय तथा दक्षिण कोरियाली क्षेप्यास्त्र प्रतिरक्षालाई चुनौती दिने उनको भनाइ छ । 

उत्तर कोरियाको सरकारी सञ्चारमाध्यमले आठचक्के गाडीको पछिल्तिरबाट ठूला ट्युबमा रकेट प्रक्षेपण गरिएको तस्वीर प्रकाशन गरेका छन् । 

‘उत्तर कोरियाले शत्रुहरूका तर्फबाट हुने सैन्य खतरा र आक्रामक दबाबको प्रतिकार गर्नका लागि नयाँ रणनीतिक हतियार विकास गर्नुपर्छ,’ किमले शनिवार बताए । 

क्षेप्यास्त्र विकसित गर्ने रक्षा वैज्ञानिकहरू देशका अमूल्य निधि भएका र उनीहरूलाई केही कुरासँग पनि साट्न नसकिने बताए । 

शनिवार केसीएनएले एउटा टिप्पणी छाप्दै उत्तर कोरियाले प्रतिबन्धबाट राहतको साटो रणनीतिक सुरक्षा कहिले पनि नसाट्ने लेखेको छ ।

एजेन्सी
 

कमेन्ट गर्नुहोस्