संघीय संसदको दुवै सदनको बैठक आज बस्दै, यस्ता छन् कार्यसूची

काठमाडौं– संघीय संसद अन्तर्गतको प्रतिनिधि तथा राष्ट्रिय सभा बैठक आज (बुधवार) बस्दैछ । आज बस्ने प्रतिनिधि सभा बैठक बिहान ११ बजे र राष्ट्रिय सभा बैठक दिउँसो २ बजे बस्ने कार्यसूची रहेको संघीय संसदको निमित्त महासचिव गोपालनाथ योगीले जानकारी दिए । 

आज बस्ने प्रतिनिधि सभा बैठकमा प्रतिनिधि सभाका सचिव गोपालनाथ योगीले “वातावरण संरक्षण विधेयक, २०७५” र “वन विधेयक, २०७५”का सम्बन्धमा राष्ट्रिय सभाबाट प्राप्त सन्देश टेबुल गर्नेछन् । 


Advertisement

त्यस्तै, उद्योग तथा वाणिज्य र श्रम तथा उपभोक्ता हित समितिका सभापति  विमलप्रसाद श्रीवास्तवले “उद्योग तथा वाणिज्य र श्रम तथा उपभोक्ता हित समितिको वार्षिक प्रतिवेदन, २०७६” पेश गर्ने कार्यसूची रहेको छ । 
आज बस्ने प्रतिनिधि सभा बैठकमा प्रधानमन्त्री के.पी. शर्मा ओलीले “लोक सेवा आयोग विधेयक, २०७५ लाई दफावार छलफलको लागि सम्बन्धित समितिमा पठाईयोस्” भनी प्रस्ताव प्रस्तुत गर्नेछन् । 

यस्तै, गृहमन्त्री रामबहादुर थापाले “नेपाल प्रहरी र प्रदेश प्रहरी (कार्य सञ्चालन, सुपरिवेक्षण र समन्वय) विधेयक, २०७५ का सम्बन्धमा राष्ट्रिय सभाबाट भएको संशोधनमाथि विचार गरियोस्” भनी प्रस्ताव प्रस्तुत गर्ने कार्यसूची रहेको छ । यससँगै उनले “प्रहरी समायोजन विधेयक, २०७५ का सम्बन्धमा राष्ट्रिय सभाबाट भएको संशोधनमाथि विचार गरियोस्” भनी प्रस्ताव प्रस्तुत गर्नेछन् ।


Advertisement

शिक्षा, विज्ञान तथा प्रविधि मन्त्री गिरिराजमणि पोखरेलले राष्ट्रिय सभाबाट सन्देश सहित प्राप्त “शिक्षा सम्बन्धी केही नेपाल ऐन संशोधन गर्ने विधेयक, २०७५ माथिको दफावार छलफल सदनमा गरियोस् भनी प्रस्ताव प्रस्तुत गर्नेछन् । 

शिक्षा, विज्ञान तथा प्रविधिमन्त्री गिरिराजमणि पोखरेलले “शिक्षा सम्बन्धी केही नेपाल ऐन संशोधन गर्ने विधेयक, २०७५ लाई पारित गरियोस्” भनी प्रस्ताव प्रस्तुत गर्ने कार्यसूची रहेको छ । 

यस्तै, आज बस्ने राष्ट्रिय सभा बैठकमा उद्योग, वाणिज्य तथा आपूर्तिमन्त्री मातृका प्रसाद यादवले विधायन व्यवस्थापन समितिको प्रतिवेदन सहितको “सेफगार्ड्स, एण्टी–डम्पिङ्ग तथा काउन्टरभेलिङ्ग विधेयक, २०७५ माथि सदनमा छलफल गरियोस्” भन्ने प्रस्ताव गर्ने तथा सो विधेयक पारितका लागि प्रस्ताव पेश गर्ने कार्यसूची रहेको छ । 

माननीय अर्थ मन्त्री डा. युवराज खतिवडाले विधायन व्यवस्थापन समितिको प्रतिवेदन सहितको “आर्थिक कार्यविधि तथा वित्तीय उत्तरदायित्व विधेयक, २०७५ माथि सदनमा छलफल गरियोस्” भन्ने प्रस्ताव र सो विधेयकलाई पारित गर्नका लागि प्रस्ताव पेश गर्नेछन् ।  
 

लोकान्तर संवाददाता
लोकान्तर संवाददाता

लेखकबाट थप...

कमेन्ट गर्नुहोस्