काठमाडौं – तत्कालीन सभामुख कृष्णबहादुर महराले संसद सचिवालयकी कर्मचारी रोशनी शाहीमाथि यौन दुर्व्यवहार गरेको घटना हाल चर्चामा छ ।

दुवैबीच यो विवादास्पद सम्बन्ध र अवस्था एकैक्षणमा आएको होइन । यसका पछाडि वर्षाैं पुरानो पृष्ठभूमि देखिन्छ ।

जनकपुरमा जन्मिएकी रोशनी शाही बुवासँगै रोल्पाको लिबाङ पुगिन् किशोरावस्थामै । बुवा स्वास्थ्यकर्मी भएकाले रोजगारीका क्रममा रोल्पामा खटिएका थिए ।

स्वास्थ्यकर्मी बुवासँगै रोशनी रोल्पाको लिबाङ–७ मेवाङस्थित कृष्णबहादुर महराको घरमा डेरामा बसिन् । महरा लिबाङ माध्यमिक विद्यालयमा शिक्षक थिए । बुवासँगै रोशनी महराकै घरमा लगभग ५ वर्ष बसिन् । उतिबेला महराका छोरा राहुल र निर्मल समेत सानै रहेका पारिवारिक स्रोतले जनाएको छ ।

महराको घरमा आफू ५ वर्ष बसेको रोशनीले आफ्नो फेसबूक स्टेटसमा लेखेकी छन् २०७४ वैशाख १६ ।

हेर्नुस् फेसबूक स्टेटस –

फेसबूक स्टेटसमा उनले ५ वर्षमा ‘मुटुमा, मनमा र पेटमा गाँसिएका सम्झनाहरू’ भनेर लेखेकी छन् ।

त्यसपछि महरा क्रान्तिका लागि जनयुद्ध गर्न जंगलतिर लागे । रोशनी समेत नर्सिङ पढाइतिर लागिन् । २०६३ सालमा तत्कालीन माओवादी शान्ति प्रक्रियामा आउँदा रोशनीले नर्सिङ पढिसकेकी थिइन् । रोशनी त्यतिबेलैदेखि माओवादी निकट रहेकी र स्वास्थ्यकर्मी संगठनका नेता चित्रजंग शाहीसँग यसबीच उनको विवाह भइसकेको थियो ।

माओवादी शान्ति प्रक्रियामा आएपछि नेता कृष्णबहादुर महरा लगातार सत्ता वरिपरि रहे । एकातिर पुरानो चिनजान र अर्काेतिर आफ्नै पार्टीको स्वास्थ्यकर्मी संगठनका नेताकी पत्नी भइसकेकी रोशनी र महराबीच काठमाडौंमा निकटता बढेको पारिवारिक स्रोतले बतायो । यसबारे महरा परिवारका सदस्यलाई जानकारी थियो तर कसैले सम्बन्धलाई रोक्ने आट गरेनन् । दुवैबीचको उतारचढावपूर्ण सम्बन्ध अगाडि बढ्दै गयो ।

अन्त्यमा महराको राजनीतिक भविष्य नै ध्वस्त पार्ने गरी रोशनीसँगको सम्बन्ध सार्वजनिक भएको छ । रोशनी र उनका पतिबीच समेत सम्बन्धविच्छेद गर्ने सम्झौता भएको छ । महराले यौन दुर्व्यवहार गरेको भनेर रोशनीले लगाएको आरोप र त्यसपछि आरोप फिर्ता गरेको घटना सार्वजनिक बहस, चासो र अनुसन्धानको विषय बनेको छ ।