प्रधानमन्त्रीका परराष्ट्र मामिला सल्लाहकार भन्छन् : केरुङ–काठमाडौं रेल्वे सम्झौता हुन्छ

काठमाडौं – प्रधानमन्त्री केपी शर्मा ओलीका परराष्ट्र मामिला सल्लाहकार डा. राजन भट्टराईले २३ वर्षपछि हुन लागेको चिनियाँ राष्ट्रपतिको नेपाल भ्रमण भव्य र ऐतिहासिक रूपमा सफल हुने विश्वास व्यक्त गरेका छन् ।

रिपोर्टर्स क्लब नेपालले बुधवार राजधानीमा आयोजना गरेको विशेष साक्षात्कारमा बोल्दै उनले यस्तो बताएका हुन् । ‘२३ वर्षपछि चिनियाँ राष्ट्रपतिको नेपालमा राजकीय भ्रमण हुँदैछ, भ्रमण ऐतिहासिक हुनेछ,’ उनले भने ।


Advertisement

 

भ्रमणका क्रममा दुई देशबीच केरुङ–काठमाडौं रेल्वेसम्बन्धी सम्झौता पनि हुने प्रष्ट पारे ।

२३ वर्षअघिको चीन र २३ वर्षपछिको चीनमा धेरै परिवर्तन आएको सुनाउँदै भट्टराईले अहिले चीनको राष्ट्रिय, क्षेत्रीय र अन्तर्राष्ट्रिय रूपमा पनि भूमिका हिजोकोभन्दा फरक रहेको बताए ।

उनले भने, ‘विश्वकै दोस्रो शक्तिशाली राष्ट्र हो । चिनियाँ राष्ट्रपतिको नेपाल भ्रमण लामो समयको प्रतिक्षा थियो ।'

उनले वर्तमान सरकार निर्वाचित भएर आइसकेपछि विदेश सम्बन्ध र उच्चस्तरीय भ्रमण आदानप्रदानमा पनि निकै फड्को मारेको दाबी गरे ।

‘विगतमा हामीलाई छिमेकीसँगमात्रै भ्रमण केन्द्रित रहेको भनेर आरोप लगाउने गरिएको थियो, तर यो सरकार आइसकेपछि हामीले युरोपीयन मुलुक, दक्षिण पूर्वी एसियाली मुलुकहरूमा पनि सक्रियताका साथ सम्बन्ध अघि बढायौं ।’

अहिले उच्चस्तरीय भ्रमण आदानप्रदानको क्रम बढिरहेको उनको भनाइ छ ।

कमेन्ट गर्नुहोस्