काठमाडौं – सिजी मोटोकर्पले सुजुकीको नयाँ कार एस–प्रेसोको प्री बुकिङ खुला गरेको छ । 

कम्पनीका अनुसार सुजुकीले पहिलोपटक ह्याचब्याक कारलाई एसयुभी सेग्मेन्टको डिजाइन दिएको छ । आधुनिक लुक्समा उपलब्ध कार यसअघिका मोडलभन्दा विल्कुलै प्रिमियम बनाइएको छ । आकर्षक लुक्सका साथै उच्च ग्राउन्ड क्लियरेन्समा ध्यान दिइएको छ । जसकाकारण ग्रामीण सडकमा दौडाउन पनि सहज हुनेछ ।

बिएस ६ मापदण्डमा आधारित कारमा ३ हजार सिसी  क्षमताको इन्जिन जडान गरिएको छ । जसले ६८ पिएस पावर दिन्छ । कारले २१.७ किलोमिटर प्रतिलिटर माइलेज दिने क्षमता राख्छ । प्री बुकिङ खुला गर्दै कम्पनीले भनेको छ, ‘आधुनिक डिजाइनमा उपलब्ध एस–प्रेसोको एकपटक अनुभव गर्नुस् । तपाईंले एसयुभी कार चढेको महसुस गर्नुहुनेछ । इन्ट्री लेभलको कारमा उच्चस्तरीय सुविधा फिचर जडान गरिएको छ ।’

यो कार हार्टटेक चेसिसको पाँचौँ जेनेरेसन हो । यो प्रविधिमा उत्पादन भएको कार तुलनात्मक रूपमा बलियो र सुरक्षित हुने गर्छ । त्यस्तै, उत्कृष्ट पावर र पफरमेन्ससमेत उपलब्ध गराउँछ । यो कारले आधारभूत सुरक्षाका मापदण्ड पूरा गरेको प्रमाणितसमेत भइसकेको कम्पनीको भनाइ छ ।

कारमा यात्रुको सुरक्षालाई विशेष ध्यान दिएर दुईवटा एयर ब्याग, एन्टी लक ब्रेकिङ सिस्टम, इलेक्ट्रोनिक ब्रेक फोर्स सिस्टम, सिट बेल्टलगायत जडान गरिएको छ । कारमा सिट बेल्ट वार्निङ र तीव्र गतिको सूचना दिने इन्डिकेटरसमेत पाउन सकिन्छ । को–ड्राइभर सिट बेल्ट रिमाइन्डर, रियर पार्किङ एसिस्टक, रिभर्स पार्किङ सेन्सरलगायतसमेत उपलब्ध छ ।

एस–प्रोसो कार आफ्नो सेग्मेन्टमा स्टेरिङ माउन्टेड अडियो र भ्वाइस कन्ट्रोल फिचरमा पहिलो स्थानमा छ । एड्भान्स स्मार्टप्लेट स्टुडियोमा म्युजिक, इन्टरटेनमेन्ट र नेभिगेसन सुविधा पाउन सकिन्छ । क्याबिनको बनावट उपभोक्तामैत्री बनाइएको छ । क्याबिनमा नयाँ ग्राफिक पाउन सकिन्छ । नेपाली बजारमा यसकाे मूल्य २२ लाख ९९ हजार रुपैयाँ पर्नेछ ।