साताको शेयर बजार : अर्ब पनि पुगेन कारोबार

प्रतिकात्मक तस्वीर

काठमाडौं – दशैंको लामो बिदापछि खुलेको शेयरबजार उतार चढावपूर्ण अवस्थामा नै रही बन्द भयो ।

चालू आर्थिक वर्षको पहिलो त्रैमासको अन्तिम सातासम्म आइपुग्दा बजारले ओरालोको यात्रा नै तय गर्‍यो ।


Advertisement

धितोपत्र बजारमा यस साता कूल १६० कम्पनीको शेयर कारोबार भए । कूल ३२ लाख ८७ हजार ९६६ कित्ता शेयर ८० करोड ७५ लाख ५६ हजार ६१२ रुपैयाँ मूल्यमा खरीदबिक्री भए ।

चिनियाँ राष्ट्रपति सी चिनफिङको नेपाल भ्रमणका कारण साताको पहिलो दिन आइतबार सरकारले सार्वजनिक बिदा दिएका कारण बजार बन्द भयो ।

सोमवारदेखि बिहीबारसम्म खुलेको बजार उकालो लाग्ने अपेक्षा रहेपनि लय समात्न सकेन ।

सोमवार नेप्से परिसूचक दोहोरो अंकले घट्यो । नेपाल स्टक एक्सचेञ्जका अनुसार नेप्से १२.०५ विन्दुले घटेर एक हजार १३६.९६ विन्दुमा पुग्यो । कूल १५४ कम्पनीको ८ लाख ३३ हजार ७५३ कित्ता शेयर रु २१ करोड ८६ लाख ३५ हजार ६९१ मूल्यमा खरीदबिक्री भए ।

मंगलबार नेप्से परिसूचकमा सामान्य सुधार भयो । सो दिन नेप्से परिसूचक ३.६२ विन्दुले बढेर १ हजार १४०.५८ विन्दुमा पुग्यो । कूल १५० कम्पनीको ७ लाख १९ हजार ३३० कित्ता शेयर २० करोड ९२ लाख ६ हजार ६३१ रुपैयाँ मूल्यमा कारोबार भयो ।

बुधवार नेप्से परिसूचक ५ अंकले ओरालो लाग्यो । नेप्से ५.०१ अंकले घटेर १ हजार १३७.०३ मा पुग्यो । स्टकका अनुसार शनिवार कूल १५९ कम्पनीका ७ लाख ३६ हजार ८८३ कित्ता शेयर १९ करोड ६६ लाख १८ हजार ९३६ रुपैयाँमा खरीदबिक्री भए ।

साताको अन्तिम दिन बिहीवार धितोपत्र बजारमा सामान्य वृद्धि भयो । सो दिन नेप्से परिसूचक ०.७१ अंकले बढेर १ हजार १३७.७५ मा पुग्यो ।  स्टकका अनुसार सो दिन कूल १६० कम्पनीका ९ लाख ९८ हजार कित्ता शेयर १८ करोड २९ लाख ९४ हजार ९०५ रुपैयाँमा खरीदबिक्री भए । स्टकमा यस साता मिथिला लघुवित्त वित्तीय संस्थाको ६८ हजार ९४६ कित्ता शेयर लाभांश सूचीकृत भए ।

बजार पूँजीकरणका आधारमा पनि यस साता नेपाल दूरसञ्चार कम्पनी नै शीर्षस्थानमा रहेको छ । नबिल बैंक, नेपाल इन्भेष्टमेन्ट बैंक, स्ट्याण्डर्ड चार्डट बैंक, एभरेष्ट बैंक, हिमालयन बैंक, नेपाल लाइफ इन्स्योरेन्स कम्पनी, एनआईसी एशिया बैंक, कृषि विकास बैंक र एनएमबी बैंक शीर्ष दशमा रहेका छन् ।

८२ कम्पनीको कारोबार रोक्का

नेपाल स्टक एक्सचेञ्जले धितोपत्र सूचीकरण विनियमावली अनुसार सूचीकरणको वार्षिक शुल्क नबुझाएका कारण ८२ कम्पनीको कारोबार स्थगित गरेको जनाएको छ ।

स्टकका सूचीकरणका शाखाका अनुसार लघुवित्त १९, व्यापार तीन, होटल दुई, अन्य २ उत्पादन ११, विकास बैंक १८, बीमा २, वित्त ११ र जलविद्युत्का १३ कम्पनीको कारोबार स्थगित गरेको हो ।

कमेन्ट गर्नुहोस्