पत्रकारको अप्ठ्यारो प्रश्नको सामना गर्न नसकेर भागिन् चिलीकी मेयर (भिडियो)

काठमाडौं – पत्रकारले सोध्ने अप्ठ्यारा प्रश्नहरूलाई टार्न खोज्ने राजनीतिकर्मी संसारभरि नै भेटिन्छन् । तर चिलीको एक शहरकी मेयर बिहीवार पत्रकारबाट कुदेरै भागेकी छन् । 

सान्टियागो दे चिलीको प्रोभिडेन्सिया कम्युनकी मेयर इभलीन म्याथेईलाई पत्रकारले सडकमा प्रश्न सोध्न थालेपछि उनी अचानक भागिन् । 


Advertisement

चिलीमा हालैका महिनामा विरोध प्रदर्शन भइरहेका छन् र म्याथेईले सरकारको संकट व्यवस्थापनविरुद्ध बोलेकी छन् । 

राष्ट्रपति सेबास्टियन पिन्येराको नयाँ मन्त्रिमण्डलमा मन्त्री बन्न उनलाई अफर आएको थियो तर उनले अस्वीकार गरिन् । 

पहेंलो सेफ्टी भेस्ट लगाएकी म्याथेई दौडिँदै भागिन् । ‘उनी भागिन्,’ स्थानीय च्यानल मेगाका एक संवाददाताले बताए, ‘उनलाई कुरा गर्न मन छैन ।’

म्याथेई भाग्दा पत्रकारहरूले लखेटे । 

‘धन्य हामी शारीरिक रूपमा तन्दुरुस्त छौं,’ ती पत्रकारले मेयरलाई समात्न दौडिने क्रममा भने । मेयरले भेटेपछि पत्रकारले प्रेसबाट तपाईंलाई कठोर व्यवहार भएको हो भनी सोधे । त्यो प्रश्न सुनेपछि उनी फेरि भागिन् । 

यो अनौठो दृश्य केही सेकेन्डपछि अन्त्य भयो र मेयरले गति घटाइन् । अनि पत्रकारले अर्को प्रश्न सोधे । 

म्याथेईले पछि आफ्नो आधिकारिक ट्विटर अकाउन्टमा यसको भिडियो राखिन् । त्यससँगै उनले लेखिन्, ‘बिहान उठेर अलिकति भए पनि व्यायाम गर्नु राम्रै हो ।’

सीएनएनबाट
 

कमेन्ट गर्नुहोस्