विज्ञको सल्लाहमा प्रदेश योजना कार्यान्वयन हुन्छ : मुख्यमन्त्री पौडेल

फाइल फोटो

काठमाडौं – प्रदेश ३ सरकारले प्रदेशको विकास लागि पहिलो आवधिक योजनामा समेटिएका विषयमाथि छलफल गरेको छ ।

प्रदेश नीति तथा योजना आयोगले शनिवार आयोजना गरेको अन्तक्र्रियामा प्रदेश ३ सरकारले योजनामा समेटिएका विषयलाई कसरी लागू गर्ने विषयमा छलफल गरेको हो ।


Advertisement

कार्यक्रममा प्रदेश ३ सरकारका मुख्यमन्त्री डोरमणि पौडेलले विज्ञको सल्लाहमा नै प्रदेशमा योजना कार्यान्वयन गर्ने बताए । ‘हामीले प्रदेशको विकासका लागि ५ वर्षे आवधिक योजना सार्वजनिक गरेका छौं,’ उनले भने, ‘ती योजनामा समेटिएका विषयवस्तुलाई कसरी प्रभावकारी बनाउन सकिन्छ भनेर विज्ञको सुझावको आधारमा योजना कार्यन्वयन गर्दछौं ।’

पूर्वाधार, कृषि, विशिष्टीकृत सेवा, उद्योग, सम्पदामैत्री पर्यटन ५ विकासका चालकलाई समेटेर आवधिक योजना ल्याएको छ ।

राष्ट्रिय योजना आयोगका उपाध्यक्ष डा. पुष्पराज कँडेलले ७ वटै प्रदेशले एकै किसिमको योजना नबनाएर फरक–फरक बनाएको भन्दै एकरुपता हुनुपर्ने बताए । ‘हामीले नबनाएका योजना पनि कतिपय प्रदेशले बनाएका पाइयो,’ उनले भने, ‘हामी र प्रदेश योजनाबीच समन्वय गरेर प्रदेशले योजना बनाउनुपर्दछ ।’

उनले सरकारको १५ औं योजनाबाट मुलुकलाई ‘समृद्ध नेपाल र सुखी नेपाली’ अभियानलाई प्रदेश सरकारले सहयोग गर्ने गरी योजना बनाउनुपर्ने बताए ।

कार्यक्रममा पूर्वाधारका विषयमा पूर्व सचिव किशोर थापा र ईश्वर जोशी, शिक्षामा प्रा.डा. मनप्रसाद वाग्ले र डा. केदारभक्त माथेमा, कृषिमा डा. रामप्रसाद अधिकारी, सूर्य राई र मीनबहादुर बस्नेत, पर्यटनमा दिपेन्द्रपुरुष ढकालले सुझाव दिएका थिए ।

कमेन्ट गर्नुहोस्