चार बित्ताको लोभमा सडक विस्तारमा अवरोध नगरौं– मुख्यमन्त्री पोखरेल

प्रदेश नम्बर ५ का मुख्यमन्त्री शंकर पोखरेलले बुटवलको सडक विस्तारमा अवरोध नगर्न यहाँ घर धनी/व्यापारीहरूलाई आग्रह गरेका छन् । 

क्षणिक स्वार्थका लागि महत्त्वपूर्ण आयोजनालाई नगुमाउन उनले नगरबासीहरूलाई सचेत समेत गराए । 


Advertisement

रूपन्देही व्यापार संघको १८औं साधारणसभा तथा १०औं अधिवेशनलाई बिहीबार सम्बोधन गर्दै मुख्यमन्त्री पोखरेलले भने, ‘राजमार्ग चौराहादेखि गोलपार्कको सडक विस्तार रोक्न माग गर्दै अदालमा मुद्दा हाल्नेले फिर्ता लिनुस् । आफ्नै खुट्टामा आफैं बञ्चरो हान्ने काम नर्गनुहोस् । दुईचार बित्ता जग्गाको लोभमा अदालत नधाउनुहोस् ।’

बुटवलको बजार क्षेत्रको व्यापार विस्तारका लागि पनि यो सडकलाई फराकिलो बनाउनुपर्ने मुख्यमन्त्री पोखरेलको जोड थियो । ‘जति अवरोध गर्‍यो उति नै बुटवलवासीलाई नै घाटा हुन्छ । यो सडकलाई विस्तार कार्य गर्न व्यापारीहरूले पनि सघाउनुपर्छ,’ पोखरेलले भने । 


Advertisement

चौराहादेखि गोलपार्कसम्म झण्डै साढे ३ किलोमिटर सडक यहाँ व्यापारीहरूले अदालतमा मुद्दा हाल्दा विस्तार कार्य अगाडि बढ्न सकेको छैन । यहाँ ३ सय ११ घरधुरी भत्काउनु पर्ने अवस्थामा छन् । बुटवलका सौन्दर्यताका लागि पनि यो सडक विस्तारको विकल्प नभएको बताउँदै आएका छन् । बुटवल कालिकापथको सडक विस्तार रोक्नेलाई पनि त्यस्ता कार्यतर्फ नजान आग्रह गरे ।

तीन वर्षदेखि काम ठप्प छ । अवैध रूपमा हुने आर्थिक कारोवारले बुटवल तथा भैरहवा क्षेत्रमा आर्थिक अपराध बढ्दै गएको मुख्यमन्त्रीले दाबी गर्दै अवैध कारोवारलाई प्रोत्साहन नगर्न व्यापारीहरूलाई आग्रह समेत गरे ।

त्यस्तो कारोवारले अपराधिक क्रियाकलाप बढ्दै जाने समेत बताए । राज्यलाई कर नतिर्नेहरूका कारण ‘इकोनिमिक्स क्राइम’ बढेको उनको भनाइ थियो ।

बुटवल–भैरहवा महत्त्वपूर्ण आर्थिक हवको रूपमा विकास भएको भन्दै यसलाई अझै विस्तार गर्नुपर्ने बताए ।

कमेन्ट गर्नुहोस्