बुधवार ओरालो लागेको धितोपत्र बजारमा शेयर कारोबार मापक नेप्से परिसूचक बिहीवार भने पुनः झिनो अंकले वृद्धि भएको छ ।

नेपाल स्टक एक्सचेञ्जका अनुसार नेप्से परिसूचक ०.७९ विन्दुले बढेर १ हजार १३५.९५ विन्दुमा पुगेको छ । सेन्सेटिभ परिसूचक भने ०.११ विन्दुले घटेर २५०.०६ विन्दुले घटेको छ । 

नेप्से झिनो अंकले बढेपनि कारोबार रकम पनि औसतमा सीमित रहेको छ । कूल १६३ कम्पनीको ८ लाख ३३ हजार ८३१ कित्ता शेयर २२ करोड ८३ लाख ५७ हजार ४९३ मूल्यमा खरीद बिक्री भए । 

कारोबार भएका कूल १२ उपसमूहमध्ये बिहीवार ४ उपसमूहको शेयर ओरालो लाग्दा ८ उपसमूहको शेयर भने बढेको छ । होटल २.५८, विकास बैंक १.३६, अन्य १.२६ र लघुवित्त ६.७ विन्दुले ओरालो लागेको छ ।

बैंकिङ १.३८, व्यापार २२.४४, जलविद्युत् ०.५६, वित्त ४.०४, निर्जीवन बीमा ८.७६, उत्पादन १.४१, जीवन बीमा १३.५९ र सामूहिक लगानी कोष ०.१५ विन्दुले बढेको छ ।

कारोबारका आधारमा बिहीवार एनएमबी बैंक शीर्ष स्थानमा रहेको छ । बैंकको ४ करोड २९ लाख ६८ हजार ३७ रुपैयाँ बराबरको शेयर कारोबार भयो ।

नेपाल बैंक लिमिटेड १ करोड ३३ लाख ५८ हजार ५१३, हिमालयन डिस्टिलरी १ करोड ३१ लाख ८९ हजार ३००, एनआईसी एसिया बैंक ८७ लाख ७९ हजार ५९७, कृषि विकास बैंकको ७७ लाख ९९ हजार ४५७ मूल्य बराबरको शेयर कारोबार भई शीर्ष स्थानमा रहे । 

कारोबारका आधारमा साल्ट ट्रेडिङ लिमिटेडका शेयरधनीले ९.९१ प्रतिशतले कमाउँदा पाँचथर पावर कम्पनी ९.६८, गुडविल फाइनान्स ६.९२, राधी विद्युत् कम्पनी ६.३८, दिव्यश्वरी हाइड्रो पावर ६.१२ र हिमालयन पावर पार्टनरका शेयरधनीले ५.९३ प्रतिशतले कमाए ।

ग्लोबल आईएमई समुन्नत स्किम एक ५.६६, आँखु खोला जलविद्युत् कम्पनी ५.२६, रिडी हाइड्रो पावर ५.१२, सुमन्नत लघुवित्त वित्तीय संस्था ४.९१, पञ्चकन्या माई हाइड्रो पावर ४.५४ र नेशनल हाइड्रो पावर कम्पनीका लगानीकर्ताले ३.७७ प्रतिशतले गुमाए ।